Insistimin e Qeverisë për të hapur Urën e Ibrit për qarkullim të automjeteve, e ka kritikuar kryetari i Drenasit nga PDK-ja, Ramiz Lladrovci.
Lladrovci i është drejtuar qeveritarëve duke i këshilluar që të mos provokojnë situata që s’mund t’i qeverisin.
Tutje ai ka shtuar se patriotizmi i vonuar bën dëm derisa gjithashtu është shprehur se loja me durimin e ndërkombëtarëve i kushton shtetit.
Postimi i plotë:
“Tuj u mundue me ndreq vetulla, mos ia lëndoni sytë Kosovës
Ura e Mitrovicës, është simbol i dhimbshëm në shtatin e Kosovës shtet. U vu nga forca madhore, forcë e cila na ndihmoi ta kemi shtetin me 10.905 kilometra katrorë, të njohur me më shumë se 115 shtete.
Loja me durimin e ndërkombëtarëve i kushton shtetit dhe kjo nuk duhet të bëhet nga kushdo që ia do të mirën Kosovës.
Zgjedhjet shkojnë e vinë, por, betonimin e urës si shenjë e ndarjes, në çfarëdo rasti do të garantohej nga forcat e KFOR-it. Ura për këmbësorë sot është e lirë. Kjo “trimëri” nuk i ka hije asnjë lideri që e mendon të tashmen e të ardhmen e Republikës së Kosovës.
Kësaj situate më së miri i shkon fjala e urtë “tuj u mundue me ia ndreq vetullat, ia nxjerr sytë”.
Patriotizmi i vonuar dhe “gjyksat” në këtë kohë, bëjnë dëm. Mos provokoni situata që nuk mund t’i qeverisni. Pa aleatët, nuk do të arrinim deri këtu, kujdes”, shkroi ai. /Gazeta Enigma
