Finalja e spektaklit më të ndjekur në Shqipëri, Big Brother VIP, ka sjellë emocione të forta për të gjithë pjesëmarrësit dhe publikun, por për Loredanën ky moment ka qenë i veçantë.
Në një postim në rrjetet sociale, ajo ka ndarë ndjesitë e saj pas përfundimit të spektaklit, duke e cilësuar këtë eksperiencë si një nga ato që mbeten përjetë në kujtesë, shkruan Indeksonline.
“Të jem pjesë e finales së Big Brother VIP ishte një përjetim që do ta mbaj mend gjatë,” shkruan Loredana. Ajo përshkruan momentin kur dritat e shtëpisë më të famshme në Shqipëri u fikën, duke e quajtur atë si mbylljen e një kapitulli të paharrueshëm.
Ish-banorja shton se shtëpia nuk ishte thjesht një vend, por një udhëtim i mbushur me kujtime, emocione, të qeshura e lot. Çdo moment, sipas saj, ka lënë një gjurmë të thellë në zemrën e saj.
Në fund të postimit, ajo ka falënderuar televizionin Top Channel për mundësinë që iu dha: “Faleminderit @topchannelalbania që më bëtë pjesë të kësaj historie. Faleminderit për emocionet.”
Për fansat dhe ndjekësit e saj, Loredana Brati mbetet një nga figurat që la gjurmë në këtë edicion të Big Brother VIP.
