Shqipëria do të organizojë nesër në orën 11:00, një ceremoninë e posaçme për nder të Luiza Gegës.
Lajmin e bëri të ditur kryeministri i Shqipërisë, Edi Rama.
“Shihemi nesër në 11.00 në ceremoninë e posaçme për nder të Luiza Gegës, me këdo e ka të mundur dhe dëshiron ta duartrokasë kampionen e parë europiane të atletikës me fanellën kuqezi të Shqipërisë”, ka shkruar Rama.
Ceremonia do të mbahet në bulevardin “Dëshmorët e Kombit”.
Luiza Gega u shpall kampione e Evropës në garën e 3 000 metrave me pengesa. Ajo arriti të thyejë edhe rekordin e kampionatit evropian, me kohën 9 minuta, 11 sekonda dhe 31 të qindtat.
Kampionia shqiptare shkoi në finale me kohën më të mirë në fazën kualifikuese dhe ishte pretendentja kryesore për të fituar këtë garë.
