Ministrat e jashtëm të 20 vendeve arabe dhe myslimane denoncuan sulmet e Izraelit ndaj Iranit dhe bënë thirrje për qetësim të situatës në një deklaratë të përbashkët, sipas agjencisë zyrtare të lajmeve MENA të Egjiptit.
Ministrat e jashtëm të Egjiptit, Jordanisë, Pakistanit, Bahreinit, Bruneit, Turqisë, Çadit, Algjerisë, Komoreve, Emirateve të Bashkuara Arabe, Xhibutit, Arabisë Saudite, Sudanit, Somalisë, Irakut, Omanit, Katarit, Kuvajtit, Libisë dhe Mauritanisë shprehën “shqetësimin e tyre të thellë për përshkallëzimin e rrezikshëm në rajon”.
Ministrat “pohuan nevojën për të respektuar sovranitetin dhe integritetin territorial të shteteve dhe parimet e fqinjësisë së mirë, duke i nxitur të gjitha palët të zgjidhin mosmarrëveshjet e tyre me mjete paqësore”, thuhet në deklaratë.
Ata gjithashtu “theksuan rëndësinë e krijimit të një Lindjeje të Mesme pa armë bërthamore dhe armë të tjera të shkatërrimit në masë” dhe i nxitën vendet të aderojnë në traktatin për Mospërhapjen e Armëve Bërthamore.
Izraeli nuk është palë në traktat – një marrëveshje ndërkombëtare e hartuar për të parandaluar përhapjen e armëve bërthamore.
Ministrat theksuan se konflikti duhet të zgjidhet me diplomaci dhe “nuk mund të zgjidhet me mjete ushtarake”.
