Qeveria e Kosovës është pro bërjes së qeseve të plastikës me pagesë, veçse janë në pritje të hulumtimit që Ministria e Mjedisit me ndihmën e GIZ-it është duke e bërë për ndikimin e qeseve në mjedis.
Rezultatet e këtij hulumtimi pritet që të përcaktojnë edhe çmimin e këtyre qeseve.
Kështu bërë të ditur zëvendësministrja e Mjedisit, Linda Çavdarbasha, e cila tha se këto qese do të zëvendësohen me qese letre dhe ato të tekstilit.
“Aktualisht, jemi duke pritur rekomandimet nga hulumtimi, mirëpo në parim jemi që qeset e plastikës të bëhen me pagesë (çmim ky i cili do të përcaktohet nga hulumtimi). Opsion tjetër kemi edhe futjen në treg të qeseve të letrës dhe qeseve të materialit (tekstil) për përdorim, me ç’rast qytetari do ketë mundësi të zgjedh se cilën nga to dëshiron ta përdorë. Kështu qytetarët do të fillojnë të mendojnë më shumë për mbrojtjen e mjedisit dhe shpresoj shumë që zgjedhjet e tyre do jenë sa më miqësore me mjedisin”, th ajo.
MMPHI me qëllim të menaxhimit të drejtë të mbeturinave sidomos për reduktimin e qeseve të plastikës njëpërdorimshme dhe përfitimit të materialeve ricikluese nga qeset e plastikës, ka formuar një grup punues ku janë të përfshirë të gjitha palët e interesit.
Çavdarbasha thotë se pavarësisht prej studimit/hulumtimit dhe rekomandimeve të dala nga grupi punues do të ndryshohet dhe plotësohet legjislacioni sekondar që ka të bëjë me reduktimin e qeseve plastike njëpërdorimshme.
Zëvendësministrja po ashtu pohon se paraprakisht, janë mbajtur takime me palët e interesit dhe kanë arritur në konkluzion se formimi i këtij grupi gjithëpërfshirës do të ndihmojë në gjetjen e një zgjidhje të përshtatshme dhe të qëndrueshme, sa i përket reduktimit të qeseve të plastikës.
“Me miratimin e Plotësim ndryshimit të ligjit për mbeturina, Udhëzimi Administrativ për përcaktimin e kërkesave teknike dhe kërkesave tjera për qeset e plastikës do të shfuqizohet, për shkak se në bazë të praktikave të deritanishme nuk ka qenë i zbatueshëm dhe nuk ka sjell ndonjë rezultat“, tha ajo për KlanKosovën.
“Më nuk është e nevojshme për importuesit dhe prodhuesit e qeseve të plastikës të përdorin aditiv për t’i bërë qeset e biodegradueshme, sepse sipas studimeve të fundit dhe rekomandimeve nga BE, shndërrimi i tyre në mikroplastikë është edhe më i dëmshëm për tokën dhe biodiversitetin”, tha Çavdarbasha.
