Pavarësisht premtimeve se gjatë dy ditëve nuk do të ketë ndërprerje të energjisë elektrike, banorëve të disa lagjeve të Prishtinës iu ndodhi e kundërta.
Vranjevci dhe Kolovica mbetën në terr në orët e fundit të vitit të vjetër. Banorët e këtyre dy lagjeve thanë se ndërprerje të rrymës kishte çdo 20 minuta. Në intervale më të gjata kohore duket se pati ndërprerje në fshatin Zllashë të kryeqytetit.
“Mbrëmë u ndal rryma në 00:00. Kemi qenë 60 anëtarë të familjes në katun, jemi mbetë në terr gati një orë. Në festat më të mira jemi pa rrymë”, u shpreh një banor i këtij fshati.
Nga KEDS- i thanë se nuk bëhet fjalë për reduktime, por për prishje të momentit të cilat punëtorët e kësaj kompanie arritën t’i evitojnë shpejtë.
Zëdhënësi i KEDS-it, Viktor Buzhala, tha se në një pjesë të Kodrës së Trimave dhe Kolovicës kishte mungesë të fazave dhe jo të energjisë elektrike, meqë sipas tij, këtë të fundit e kanë siguruar nga importi.
