Presidentja e Republikës së Kosovës, Vjosa Osmani-Sadriu ka takuar kryetarin e Kuvendit Konsultativ të Shtetit të Katarit, Hassan bin Abdulla Al-Ghanim me të cilin diskutoi për thellimin e bashkëpunimit dypalësh në mes të dy vendeve tona.

Siç bëhet e ditur përmes një komunikate për media, Osmani ka falënderuar kryetarin Al-Ghanim për mbështetjen e vazhdueshme të shtetit të Katarit, duke ritheksuar gatishmërinë për forcimin e bashkëpunimit ndërshtetëror në fusha të ndryshme duke përfshirë ekonominë, energjetikën dhe bujqësinë.

“Dy bashkëbiseduesit këmbyen mendimet për ndikimin e agresionit rus kundër Ukrainës në kontinentin evropian dhe rajonin tonë, sigurinë energjetike dhe atë të ushqimit”, thuhet në njoftim.

Osmani bëri thirrje për rritje të bashkëpunimit ndërparlamentar si një mjet i fuqishëm bashkëpunimi mes dy shteteve. Si dy vende mike, Kosova dhe Katari mbeten partnerë të besueshëm dhe të përkushtuar për të thelluar raportet bilaterale. / Gazeta Enigma.