Instituti Hidrometeorologjik i Kosovës (IHK) ka bërë të ditur se fushat e fuqishme ciklonike të cilat kanë përfshirë vendin, vazhdojnë të jenë të paqëndrueshme, duke krijuar kushte për mot me intervale të shkurta me diell dhe vranësira konvektive të cilat edhe gjatë ditës së shtunë do të shoqërohen me reshje shiu me stuhi dhe shkarkime rrufesh.
Sipas IHK-së, reshjet me intensitet më të lartë priten në jug, jugperëndim, perëndim dhe veriperëndim të vendit. Në vende të kufizuara ekziston rrezik për breshër.
IHK-ja parashikon se temperaturat minimale do të lëvizin ndërmjet 11-14 gradë celsius, ndërsa maksimalet e ditës parashihen të lëvizin ndërmjet 21-23 gradë celsius.
Do të fryjë erë nga juglindja, perëndimi dhe jugperëndimi e lehtë dhe lokalisht e fortë.
“Qytetarët apelohen që në kohën kur fillojnë reshjet me stuhi, të qëndrojnë brenda lokaleve, shtëpive dhe vendeve të tjera të sigurta. Qytetet, për shkak të reshjeve të shpejta, mund të kenë problem me vërshime”, thuhet në njoftim.
