Ish-kryeministri i Kosovës Avdullah Hoti ishte pjesë e ceremonisë së betimit që u zhvillua në Bashkinë e Tiranës, ku pjes e kësaj ceromonie ishin 22 shtetas që morën nënshtetësinë shqiptare.
Avdullah Hoti në vitin 2020 nënshkroi marrëveshjen për normalizimin e mardhënieve ekonomike midis Kosovës dhe Serbisë, në prani të presidentit të SHBA të asokohe, Donald Trump.
“Një pjesë e madhe e vëllezërve dhe motrave që bashkohen sot me shtetësinë e re, janë nga Kosova dhe kanë shumë të freskët plagën dhe gjithë tragjedinë e luftës. Rëndësia për të pasur qytete progresive, qytete me mendje të hapur, qytete ku ne gjejmë arsyet që na bashkojnë, jo të shikojmë dallimet që kemi me njëri-tjetrin, janë qytetet e të ardhmes! Ndaj, më vjen mirë që sot, 22 shtetas të rinj i bashkohen qytetit tonë, shtetit tonë, edhe misionit tonë për një Shqipëri që bën progres, edhe për një vend që modernizohet dita ditës”, tha Erion Veliaj.
Kryebashkiaku Veliaj tha gjatë kësaj ceremonie se qyteti i Tiranës është i destinuar të rritet.
“Në këto 102 vjet si Kryeqytet ne kemi pasur një eksperiencë të jashtëzakonshme – nisi si një qytezë e vogël, kurse sot është edhe Kryeqyteti Europian i Rinisë. Qyteti vjet u rrit me 32 mijë banorë, ose ndryshe 10 mijë apartamente dhe 10 mijë makina. Tirana është një qytet, i cili vetëm rritet dhe shërbimet ndaj qytetarëve kërkojnë standardet që kemi vendosur këto vite”, tha Veliaj.
