Një zyrtar i afërt me presidentin rus, Vladimir Putin, ka kërcënuar se Londra do të jetë qyteti i parë që do të bombardohet nëse shpërthen Lufta e Tretë Botërore.
Anëtari i Dumës, Andrey Gurulyov, e bëri këtë kërcënim për Britaninë e Madhe, në një intervistë për televizionin shtetëror rus, Rossiya 1.
Paralajmërimi vjen midis zhvillimeve alarmuese se lufta në Ukrainë mund të eskalojë në një konfkikt global, për shkak se Lituania si anëtare e NATO-së po i bllokon mallërat e destinuara për enklavën ruse të Kaliningradit.
Në kërcënimin e tij që është cilësuar edhe si propagandë frikësuese për Perëndimin, Gurulov ka përshkuar në detaje planet e Rusisë për ta mposhtur NATO-n.
“Në operacionin e parë ajror ne do ta shkatërrojmë gjithë grupin e satelitëve që armiku e ka në gjithësi. Askush nuk do të mërzitet se a janë ata amerikanë apo britanikë, sepse ne do t’i shohim të gjithë si NATO”, tha ai.
“Së dyti, ne do ta neutralizojmë të gjithë sistemin anti-ajror, kudo dhe atë 100 për qind”, vazhdoi ai, për të sqaruar edhe qytetet që do të jenë cak i sulmeve. “Dhe e treta, natyrisht se ne nuk do të fillojmë nga Varshava, Parisi apo Berlini. Së pari do të goditet Londra.”
Sipas anëtarit të komitetit parlamentar rus të mbrojtjes, të gjitha pikat e furnizmit me rryme do të shkatërrohen. “Evropa Perëndimore do të mbetet pa furnizim me rrymë dhe do të bllokohet”.
Gurulyov është një ish-komandant ushtarak rus, që ka shërbyar edhe në Siri. Ai është në mesin e personave të sanksionuar nga SHBA për shkak të lidhjeve të ngushta të tyre me Putinin.
Në muajin shkurt ai dyshohet të jetë dëgjuar në disa biseda të përgjuara duke i urdhëruar vartësit e tij që t’i digjnin shtëpitë e ukrainasve, pas nxjerrjes së familjeve në rrugë.
Vepra e tillë konsiderohet si krim lufte.
