Një palestinez është qëlluar për vdekje dhe gjashtë persona të tjerë kanë mbetur të plagosur, në mesin e tyre edhe dy gazetarë, nga forcat izraelite në qytetin Deir al-Hatab, në lindje të Nablusit në Bregun Perëndimor.
“Alaa Zaghal, 21 vjeç, vdiq nga një plagë me plumb në kokë nga ushtria okupuese izraelite”, thuhej në një deklaratë të lëshuar të mërkurën e 5 tetorit nga Ministria palestineze e Shëndetësisë.
“Të paktën gjashtë palestinezë të tjerë, përfshirë dy gazetarë, u plagosën nga zjarri izraelit”, u tha tutje në deklaratë, shkruan Al Jazeera.
Ushtria izraelite konfirmoi se po kryente një operacion ushtarak në fshatin Deir al-Hatab.
Banorët vendas thanë se ushtria kishte rrethuar një shtëpi brenda fshatit, duke vrarë Zaghalin dhe duke qëlluar mbi një ekip të medias lokale që po mbulonte incidentin.
Dhuna ishte e fundit që goditi veriun e Bregut Perëndimor të pushtuar nga Izraeli, një zonë që ka pasur sulme pothuajse ditore, shumë prej tyre vdekjeprurëse, nga trupat izraelite që nga muaji mars.
Nablusi është bërë gjithnjë e më shumë një objektiv i operacioneve izraelite pas shfaqjes së një fraksioni të ri të armatosur, një koalicion i lirë luftëtarësh palestinezë të quajtur “Gropa e Luanëve”.
