Dëshmitari Stanko Axhiq ka thënë se në ditën kritike kur ka shkuar në zyre ka parë zyrtarin policor duke larguar hardiskun nga monitorët. Ai këtë deklarim e bëri të premten në gjykimin për vrasjen e ish-politikanit serb, Oliver Ivanoviq.
“Në momentin kur kam ardhë në zyre më duket se edhe në deklaratë e kam sqaruar zyrtari policor e ka hequr hardiskun nga monitorët ku ishte e vendosur”, ka deklaruar dëshmitari duke u përgjigjur në pyetjet e prokurorit special Burim Çerkini.
I njëjti fillimisht, duke u përgjigjur në pyetjet e mbrojtëses së të akuzuarës Silvana Arsoviq, avokates Jovana Filipoviq ka thënë se ka shkuar shumë shpesh në zyrën e të ndjerit Ivanoviq.
“Në zyrën e Oliverit kam shkuar shumë shpesh pasi që isha edhe një kandidat për asamblist i partisë që ai udhëhiqte”, deklaroi ai.
I njëjti ka thënë se mesa di ai njohja e të akuzuarës Arsoviq për përdorimin e kompjuterit është e dobët.
“Unë sa e di njohja e kompjuterit nga ana e Silvanës është mjaft e dobët”, tha ai.
Dëshmitari Axhiq tha se në momentin e arrestimit të të akuzuarve i ka dërguar një mesazh të akuzuarës Arsoviq nga një portal i quajtur “B-52”.
Në pyetjen e avokates se pse ka dërguar një mesazh të tillë, dëshmitari u përgjigj duke thënë se e njëjta ishte sekretare e Ivanoviqit.
“Është shumë e thjeshtë, ajo ka qenë sekretaresh e zyrës së partisë së Oliverit dhe kemi pas kontakte çdo ditore dhe pasi ky lajmi ishte në lidhje me vrasjen e Oliverit”, deklaroi ai.
Tutje, dëshmitari ka thënë se nuk i kujtohet përgjigja e të akuzuarës Arsoviq dhe se të njëjtën e njeh nga viti 2010.
Ndër të tjera, dëshmitari Axhiq gjithashtu ka thënë se Ivanoviq vazhdimisht ka kontrolluar kamerat dhe se nuk beson që i njëjti do t’i linte ato që të mos punojnë as edhe një orë të vetme.
Në pyetjen e të akuzuarës Arsiq se a do ta njoftonte Ivanoviq nëse dëshmitari Axhiq do të kishte informatë se është anëtare e grupit të krimit të organizuar, dëshmitari ka thënë se natyrisht.
Ndërsa, duke u përgjigjur në pyetjet e prokurorit Çerkini dëshmitari Axhiq ka thënë se hardisku i kamerave ishte i vendosur në një zyre të vogël.
“Hardisku ishte i vendosur në zyrën e vogël pranë sallës për mbledhje, kurse kompjuterët ishin vetëm monitories, kishin mundësi vetëm të monitorojnë jo edhe të regjistrojnë”, tha i njëjti, raporton “Betimi për Drejtësi”.
Mesazhin të cilin ia ka dërguar të akuzuarës Arsiq, i njëjti ka thënë se e ka dërguar si një artikull.
“E kam dërguar mesazhin nga portal B-92 Silvanës si një artikull në atë gazetë në lidhje me këtë rast, po nga telefoni”, deklaroi ai.
Duke u përgjigjur në pyetjet e trupi gjykues, dëshmitari Axhiq ndër të tjera ka thënë se kompjuterët kanë qenë në një zyre të mbyllur me një derë dhe mur.
“Ajo zyre ishte e mbyllur me një derë dhe një mur pa mbylljen me çelës”, ka deklaruar i njëjti.
Ndërsa, në pyetjen se ka pasur mundëi të hyjnë, i njëjti është përgjigjur se kanë mundur.
“Po si në çdo zyre tjetër”, tha ai.
Në pyetjen se a ka pasur mundësi që kamerat të jenë të kyçura dhe Ivanoviq ta ketë këtë informacion dhe të mos merr ndonjë veprim, dëshmitari tha se mendon që jo.
I njëjti ka deklaruar se lajmin për vrasjen e Oliverit e ka marrë nga i ati i cili i ka thënë se Ivanoviq është gjuajtur me armë dhe gjendet në spital.
Ndërsa, në pyetjen se a mund të kuptohet se meqenëse Arsiq ka qenë sekretare e Ivanoviq, do të thotë se ka pasur besim të madh, dëshmitari ka deklaruar se po.
“Shumë besim të madh”, ka thënë ai.
I njëjti ka deklaruar ndër të tjera se Ivanoviq ka anashkaluar diskutimet për sigurinë e tij dhe se ka folur gjithmonë për sigurinë e përgjithshme.
Ndryshe, në këtë seancë gjykata ka aprovuar kërkesat e mbrojtësve të të akuzuarve dhe ka zëvendësuar masën e arrestit shtëpiak me masën e lajmërimit në stacionin policor.
Ndryshe, seancat e radhës pritet të mbahen më 29 nëntor të këtij viti si dhe 10 dhe 11 janar 2023.
Të akuzuarit Nedejklo Spasojeviq, Marko Roshiq, Rade Basara dhe Silvana Arsoviq ngarkohen se në bashkëpunim edhe me të pandehurit që janë në arrati Zheiko Bojiç, Zvonko Veselinoviç dhe Milan Radoiçiç kanë kryer vrasjen e Oliver Ivanoviqit.
Seanca fillestare ishte mbajtur me 11 shkurt 2020, kurse Gjykata Themelore në Prishtinë, më 6 prill 2020, kishte refuzuar kërkesat për hudhjen e aktakuzës dhe kundërshtimet e provave.
Pas ankesave të katër avokatëve, Gjykata e Apelit kishte aprovuar ankesat e mbrojtësve dhe çështja ishte kthyer në rivendosje.
Sipas Apelit, në rivendosje nga gjykata e shkallës së parë duhet të eliminohen kundërthëniet, duke i dhënë mundësi prokurorit për tu deklaruar ose për ta korrigjuar dhe plotësuar aktakuzën në mënyrë që aktakuza të jetë në përputhje me nenin 241 të KPPRK-së.
Më pas, me 10 nëntor 2020, Prokuroria Speciale kishte përpiluar aktakuzën, ku thuhet se të pandehurit Nedejklo Spasojeviq, Marko Roshiq, Rade Basara dhe Silvana Arsoviq, nga viti 2014 deri në vitin 2018, respektivisht me datën 16 janar 2018, në qytetin e Mitrovicës, në bashkëpunim me të pandehurit Zhelko Bojiq, Zvonko Veselinoviq dhe Milan Radoiçiq, të cilët gjenden në arrati dhe me dy të pandehur tjerë që deri më tani janë të panjohur për organet e rendit, duke vepruar si grup i organizuar dhe i strukturuar, me hiearki në grup dhe me role të përcaktuara, nën udhëheqjen e të pandehurve Zvonko Veselinoviq dhe Milan Radoiçiq.
Në atë mënyrë të gjithë të pandehurit në vazhdimësi dhe në bashkëveprim ndërmjet veti, me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë, ku secili nga të pandehurit ditën kritike kur edhe ka ndodhur vrasja e tani të ndjerit Oliver Ivanoviq, kanë kryer veprime inkriminuese konkrete për qëllim të grupit në fjalë, me ç’rast si pasojë e veprimeve të këtij grupi kriminal të organizuar ka ardh deri te vrasja e tani të ndjerit Ivanoviq.
I pandehuri Nedejlko Spasojeviq, thuhet se duke vepruar si anëtar i grupit kriminal, ka ndihmuar në kryerjen e veprës penale vrasje e rëndë, ka bashkëpunuar ngushtë me të dyshuarit e panjohur që të kryejnë vrasjen e tani të ndjerit Ivanoviq, me ç’rast me dashje dhe dijeni i ka ndihmuar të dyshuarit e panjohur në kryerjen e veprës penale të vrasjes së rëndë, duke krijuar kushtet dhe mënjanuar pengesat për kryerjen e kësaj vepre penale, ashtu që fillimisht i njëjti u ka mundësuar të dyshuarve që të lëviznin me veturën zyrtare të policisë të markës “Golf IV”, karavan, më pas i ka dërguar të njëjtit tek vetura “Opel Astra”, ngjyrë e kaltër, pa targa, nga e cila veturë është shtënë në drejtim të ndjerit Ivanoviq, e që për pasojë ka ndërruar jetë në spitalin e Mitrovicës.
Tutje, thuhet se përveç kësaj i pandehuri Spasojeviq, në ditën kritike së bashku me dy policët që kanë qenë të parët në vendin e ngjarjes Zharko Jovanoviq dhe Dragisha Markoviq, me dashje dhe dijeni ka shpërdorur detyrën e tij zyrtare duke mos i kryer detyrat e domosdoshme të përcaktuara me ligj, me qëllim të përfitimit të çfarëdo dobie për vete ose për personin tjetër, në atë mënyrë që ka lejuar personat e paautorizuar të futen në vendin e ngjarjes dhe të dëmtojnë provat që kanë qenë aty, ku edhe kishte ndodhur vrasja e të ndjerit Ivanoviq.
Sipas aktakuzës, i pandehuri Marko Roshiq, duke vepruar si anëtar i grupit kriminal, ka ndihmuar në kryerjen e veprës penale vrasje e rëndë, duke bashkëpunuar ngushtë me të pandehurit Spasojeviq, Basara, Bojiq, Veselinoviq, dhe Radoiçiq, në atë mënyrë që me veturën e tij të llojit “Santa Fe”, ka përcjellë çdo lëvizje të tani të ndejrti Ivanoviq, para vrasjes së tij, ku pas vrasjes, në rrobat e të ndjerit është gjetur një letër, në të cilën kanë qenë të dhënat e veturës “Santa Fe”, ngjyrë e zezë.
Kjo veture thuhet se pas vrasjes së viktimës e ka përcjellë edhe vëllain e viktimës Mirosllav Ivanoviq, e njëjta veturë është në pronësi dhe përdorim të pandehurit Roshiq dhe vetura e përmendur parkohet tek restoranti “Grey” që është pronë e të pandehurit Milan Radoiçiç.
Aktakuza thotë se i pandehuri Rade Basa, në cilësinë e zyrtarit policor, konkretisht hetues në Njësinë e Hetimeve Regjionale në Mitrovicë- Veri, nuk i ka përmbushur detyrat e tij zyrtare me qëllim të përfitimit të çfarëdo dobie për vete apo për personin tjetër dhe i njëjti duke vepruar si anëtar i grupit kriminal, njëkohësisht si hetues policor, ka bashkëpunuar ngushtë me Zheljko Bojiq dhe me grupin kriminal të organizuar e që është udhëhequr ngga Milan Radoiçiq, nga i cili grup ka marrë urdhra për të fshehur dhe eliminuar dëshmitë-provat, dhe nga grupi kriminal është angazhuar që t’i fsheh gjurmët e krimit, t’i selektojnë rastet nën hetim, ku në ato raste ku pjesëtarët e grupit kriminal të Milan Radoiçiq, kanë qenë në cilësinë e të dyshuarve, nuk i ka hetuar me qëllim që ato raste të mos zbardhen dhe të mbesin të pazbuluara, me ç’rast me dashje nuk i ka kryer detyrat e domosdoshme të përcaktuara me ligj.
Për të pandehurën Silvana Arsoviq, thuhet se si anëtare e grupit kriminal të organizuar, duke bashkëpunuar ngushtë me të dyshuarit që kanë qenë në koordinim për vrasjen e Ivanoviq, ka ndihmuar në kryerjen e veprës penale të vrasjes së rëndë, duke bërë krijimin e kushteve dhe mënjanimin e pengesave për kryerjen e veprës penale në atë mënyrë që në kohën e aktit të kryerjes së vrasjes të Ivanoviq, e pandehura ka qenë në dijeni se kamerat e sigurisë në zyret e SDP-së kanë qenë të ndalura në mënyrë të dhunshme, duke u ç’kyçur nga rryma, me ç’rast u është mundësuar lehtësim të dyshuarve që të mos incizohen nga kamerat e sigurisë, kur të kryhet akti i vrasjes ndaj të ndjerit Ivanoviq.
E njëjta thuhet se me datën 16 janar 2018, në ora 08:16, menjëherë pas vrasjes së Ivanoviqit, i ka aktivizuar kamerat e sigurisë në zyret e partisë SDP, e cila ka qenë duku punuar si administratore në këto zyre dhe si person i vetëm në objektin e përmendur në kohën kur është kryer vrasja.
Me këtë të pandehurit, sipas prokurorisë, kanë kryer veprën penale pjesëmarrje ose organizimi i grupit kriminal të organizuar nga nenin 283, paragrafi 3 lidhur me paragrafin 1 të KPRPK-së lidhur me veprat penale vrasje e rëndë sipas nenit 179, paragrafi 1.9 të KPRK-së dhe veprën penale keqpërdorim i pozitës apo autoritetit zyrtar sipas nenit 442, paragrafi 2, nënparagrafi 2.1lidhur me paragrafin 1 të KPRK-së.
Tutje, aktakuza thotë se i akuzuari Dragisha Markoviq, me datën 16 janar 2019, në cilësi të zyrtarit policor, pa autorizim i ka vënë në dispozicion personit tjetër informatën, e cila përbën fshehtësi zyrtare, në atë mënyrë që derisa ishte në detyrë zyrtare nga vendi i ngjarjes, ku edhe kishte ndodhur vrasja e Ivanoviq, me qëllim të publikimit apo shfrytëzimit të asaj informate, jashtë territorit të Republikës së Kosovës, duke i raportuar një zyrtari policor në shtetin e Serbisë ende pa u konfirmuar lajmi se është vrarë tani i ndjeri Ivanoviq.
Me këtë akuzohet se ka kryer veprën penale “Zbulim i fshehtësisë zyrtare”.
Në vijim thuhet se Dragisha Markoviq dhe Zharko Javanoviq, në datën 16 janar 2018, në cilësi të personave zyrtare, kanë shpërdorur detyrën e tyre zyrtare duke mos i kryer detyrat e domosdoshme të përcaktuara me ligj, në atë mënyrë që pas vrasjes së Ivanoviq, kanë dal në vendin e ngjarjes, nuk e kanë siguruar mirë vendin e ngjarjes duke lënë persona të tjerë që të ndërhyjnë në atë hapësirë, si dhe të njëjtit me qëllim që t’i bëjnë të pashfrytëzueshme provat në procedura zyrtare, kanë manipuluar me to, duke i hequr dhe fshehur ato, ashtu që fillimisht i pandehuri Dragisha Markoviq bën me dorë në drejtim të gëzhojës, e cila ishte gjetur në vendin e ngjarjes, e të cilën më pas i pandehuri Jovanoviq e merr, e fut në xhep dhe së bashku me Markoviq largohen nga vendi i ngjarjes.
Me këtë akuzohet se kanë kryer veprën penale keqpërdorim i detyrës zyrtare në bashkëkryerje.
Ndërsa, Jovanoviq, gjithashtu akuzohet për mbajtje në pronësi, kontroll ose posedim të paautorizuar të armëve, pasi të njëjtit me datën 10 shkurt 2018, sipas aktakuzës, gjatë kontrollit të shtëpive dhe objekteve përcjellëse dhe gjatë kontrollit të banesës së tij, është gjetur dhe konfiskuar një armë e markës TT, e kalibrit 7.62 mm, dhe 9 fishekë të kalibrit 7.62 mm, të cilat i pandehuri i ka poseduar pa leje.
