Ish-kryeministri Avdullah Hoti ka deklaruar se Lidhja Demokratike e Kosovës po ndjek me shumë kujdes situatën e krijuar pas dështimit të sotëm, në Bruksel, të përpjekjeve për të gjetur një zgjidhje ndërmjet Kosovës dhe Serbisë, me ndërmjetësimin e BE-së.
Sipas tij, LDK-ja vlerëson se stabiliteti dhe siguria janë kushte thelbësore për të arritur progres, si dhe për të ushtruar sovranitetin në gjithë territorin e saj.
Ai shtoi se shtrirja e ligjshmërisë në gjithë territorin është e drejtë e pamohueshme e Kosovës, ndërsa theksoi se suksesin e garanton koordimi me aleatët tanë, ShBA dhe BE.
“Qeveria e Kosovës në asnjë rast nuk duhet të sillet në atë mënyrë që Serbia të duket mirë dhe të fajësohet Kosova, siç ndodhi sot. Kosovës i duhen aleatët e saj, përkrahës historik të popullit të Kosovës”, shkroi deputeti i LDK-së në Facebook.
“Kush i dëmton raportet me aleatët, rrezikon ta lë vendin tonë pa përkrahje. Kosova ka arritur deri këtu bashkë me aleatët dhe kështu duhet të vazhdojë edhe më tutje”, u shpreh ligjvënësi opozitar.
