Kryetari i SBAShK-ut Rrahman Jasharaj, ka reaguar për videon e Lëvizjes Vetëvendosje në të cilën ata shfaqën edhe fotografinë e tij.
Jasharaj ka ironizuar, duke thënë se i falëndëron LVV-në që nuk e kanë harruar.
Ai potencoi se kjo nuk hera e parë që bëhet video e tillë, e sipas tij arsyet janë grevat dhe paraqitjet e tij kritike në media ndaj Qeverisë.
Ai nuk deshi të flasë për cilësinë e dobët dhe pa përmbajtje të kësaj videoje por kritikoi regjisorin dhe skenaristin për përzgjedhjen e fotos të tij.
“Ata le të vazhdojnë të krijojnë shpifje e rrena dhe t’i kthejnë në video propaganduese, por të drejtën për zgjedhje të foto le të mos ma mohojnë. Nëse nuk kanë kohë duke u marrë me shpifje e rrena të kërkojnë në google, atëherë le të ma dërgojnë një adresë dhe unë u premtoj se për videon tjetër do t’ua dërgoj ndonjë foto timen që më pëlqen”, shkroi Jasharaj në formë ironie.
Postimi i plotë:
Në vend të reagimit ndaj videos së VV-së
Lëvizje Vetëvendosje ju faleminderit që nuk më kishit harruar
Isha personazh edhe në një video tjetër të Vetëvendosjes, por atëherë nuk thashë ndonjë fjalë sepse u mundova ta kuptoj zemërimin e tyre ndaj meje për arsye të grevës dhe paraqitjeve të mija kritike në medie ndaj qasjes së Qeverisë ndaj kërkesave legjitime të grevistëve.
Edhe tani kur publikuan një video tjetër nuk dua të kritikoj e të flas për cilësinë e dobët dhe pa përmbajtje të kësaj video, por dua ta kritikoj regjisorin dhe skenaristin për foton time. Fotoja që kanë përdorë është më e keqja. Unë nuk jam i bukur, por ama ka shumë foto të mijat që janë më të mira se kjo në video. Regjisorin dhe skenaristin i lus me mirësi për një marrëveshje . Ata le të vazhdojnë të krijojnë shpifje e rrena dhe t’i kthejnë në video propaganduese, por të drejtën për zgjedhje të foto le të mos ma mohojnë. Nëse nuk kanë kohë duke u marrë me shpifje e rrena të kërkojnë në google, atëherë le të ma dërgojnë një adresë dhe unë u premtoj se për videon tjetër do t’ua dërgoj ndonjë foto timen që më pëlqen.
Krejt në fund Lëvizje Vetëvendosje ju faleminderit që nuk më kishit harruar as në këtë veprën e fundit “artistike”.
