Deputetja Duda Balje ka bërë të ditur se ka raportuar një rast te organet policore, pasi që përmes telefonit është kërcënuar dhe shantazhuar nga personi me inicialet B.S.
Balje ka theksuar se kërcënimi ka qenë serioz dhe është bërë me dashje.
Ajo theksoi se personit në fjalë me inicialet B.S, i cili dyshohet se e kërcënoi, gjykata ia ka caktuar masën e paraburgimit prej 30 ditëve.
“Këtë herë, përmes këtij postimi dëshiroj të bëj një sqarim për opinionin publik lidhur me një shkrim që ka qarkulluar sot në portalet tona lidhur me një rast ku unë kam qenë viktimë e kërcënimit dhe shantazhit nga personi me inicialet B.S”, ka thënë Balje.
Deputetja potencoi se i dyshuari e ka pranuar në tërësi fajin.
“Me datë 16 janar 2023, unë kam raportuar një rast te organet policore dhe prokuroriale pasi që përmes telefonit jam kërcënuar për jetën time dhe të familjes time. Kërcënimi ka qenë serioz dhe është bërë me dashje të drejtëpërdrejtë nga një person me përgjegjësi të plotë penale. Rrjedhimisht me datë 17 janar 2023 me kërkesë të prokurorisë, gjykata i ka caktuar të dyshuarit B.S masën e paraburgimit në kohëzgjatje fillestare prej 30 ditëve. Sipas informacioneve që unë kam si viktimë e rastit, i dyshuari ka pranuar në tërësi fajin për veprat penale që po gjykohet”.
“Unë nuk dëshiroj të jap më shumë informacione lidhur me këtë rast, pasi që procesi gjyqësor ende nuk ka përfunduar dhe nuk dëshiroj të ndikoj në asnjë formë mbi rastin. Unë i besoj plotësisht organeve gjyqësore në shtetin e Kosovës dhe shpresoj që drejtësia do të thotë fjalën e vet meritore për këtë rast”.
Ajo ka falënderuar policinë e Kosovës për reagimin me kohë dhe korrekt.
“Më lejoni të theksoj që unë gjithmonë do të jem armik i dhunës ndaj grave në cilëndo formë që mund të shfaqet ajo. Secila grua që ka qenë viktimë e dhunës në shtetin tonë, për mua është heroinë dhe mësim që ne duhet të nxjerrim si shtet. Sa i përket rastit tim, ju konfirmoj që unë jam falenderuese për reagimin me kohë dhe korrekt të policisë, prokurorisë dhe gjykatës. Megjithatë më duhet të shtoj se ky rast që më ka ndodhur mua, nesër mund t’i ndodhë kujtdo. Prandaj e shoh të rëndësishme që të gjithë ne të jemi unik kundër dhunës ndaj grave, në këtë betejë që është e secilit. Më lejoni të falenderoj sidomos mediat dhe portalet për korrektësinë që kanë treguar në rastin tim por edhe në rastet tjera të ngjashme”.
“Për shkak të shumë pyetje që më jeni parashtruar lidhur me të dyshuarin B.S., duhet të them se bëhet fjalë për një person i cili është recidivist i shumëfishtë i vepra penale edhe përkundër faktit që ai shumicën e kohës nuk qëndron në Kosovë. Në gjykimin tim, B.S. është person me aftësi të mëdha manipuluese të cilat i shfrytëzon për përfitime të ndryshme, qoftë edhe për vëmendje të publikut. Sipas vlerësimit tim, ky person në aspektin shkencor psikologjik është mjaft jostabil dhe për pasojë është shumë i rrezikshëm për viktimat që përzgjedh ai. Sidoqoftë unë dhe familja ime aktualisht kemi arritur të qetësohemi nga ky rast dhe po ndjehemi mjaft të sigurt në duart e institucioneve shtetërore”.
“Faleminderit të gjitha mediave, grave, vajzave, miqve, qytetarëve dhe familjes time për përkrahjen tuaj. Pasi që procesi gjyqësor është duke vazhduar, unë nuk do të prononcohem më lidhur me këtë rast në publik, por vetëm organeve prokuroriale dhe gjyqësore”.
