Sekretari i Përgjithshëm i partisë “Alternativa” në Maqedoni të Veriut, Zeqirja Ibrahimi, u ka bërë thirrje partive shqiptare atje që ta fillojnë nismën për krijimin e një Asociacioni të komunave më shumicë shqiptare.
Përmes një postimi në Facebook, Ibrahimi tha se shqiptarët në Maqedoni të Veriut nuk duhet të kërkojnë asgjë më e shumë e as më pak sesa një asociacion sikurse ai që po kërkohet nga ndërkombëtarët që ta formojë Kosova për pakicën serbe.
“Në kohën që Kosova gjendet para marrëveshjes finale për normalizimin e marrëdhënieve me Serbinë dhe kur secili diplomat perëndimor që vjen në Prishtinë e përsërit refrenin “të bëhet Asociacioni i Komunave me Shumicë Serbe në Kosovë!”, pyetja që duhet të shtrohet është se pse partitë shqiptare në Maqedoninë e Veriut, ato që kanë komuna (BDI, ASH dhe BESA), nuk e ngrenë një iniciativë për themelimin e Asociacionit të Komunave Shqiptare në Maqedoninë e Veriut po me ato kompetenca që bashkësia ndërkombëtare kërkon t’i ketë Asociacioni i Komunave me Shumicë Serbe në Kosovë. Asgjë më shumë. Vetëm aq”, ka shkruar Ibrahimi në një status në Facebook.
Ibrahimi tha se pasi që perëndimi po e kërkon krijimin e Asociacionit të Komunave me Shumicë Serbe në Kosovë, edhe krijimi i një të tilli në Maqedoni të Veriut i shkon përshtati vlerave perëndimore, njofton Klankosova.tv.
“Ata që e kërkojnë këtë nga Kosova janë aleatët tanë perëndimorë, andaj kjo njësi i bie të jetë në frymën e vlerave perëndimore. Shumë mirë atëherë. Ta bëjmë edhe ne në Maqedoninë e Veriut një Asociacion në këtë frymë perëndimore! Ja një kauzë që mund t’i bashkojë të gjitha partitë shqiptare, madje edhe Alternativën që nuk ka komunë. Ta fillojmë që sot nismën “Asociacioni i Komunave më Shumicë Shqiptare në Maqedoninë e Veriut!” Reciprocitet i bukur dhe, njëherazi, evropian, apo?!”, pyeti Ibrahimi.
“Mbase kështu arrijmë edhe te tema e reciprocitetit gjuhësor mes shqipes në Maqedoninë e Veriut dhe serbishtes në Kosovë”, përfundoi Sekretari i Përgjithshëm i “Alternativës”, Zeqirija Ibrahimi.
