Presidenti i Serbisë, Aleksandar Vuçiq, ka thënë se takimi i ardhshëm me kryeministrin e Kosovës Albin Kurti në Bruksel do të jetë i vështirë. Ai pohoi se “të gjithë njerëzit e mëdhenj në Perëndim janë kundër Serbisë”.
Vuçiq dhe Kurti janë takuar me shefin e diplomacisë evropiane, Josep Borrell, duke filluar nga ora 18:00 dhe me përfaqësuesin special të BE-së për dialogun ndërmjet Serbisë dhe Kosovës, Miroslav Lajçak, njoftoi Shërbimi Evropian për Çështje të Përbashkëta.
“Do të jetë e vështirë. Të gjithë të mëdhenjtë në Perëndim janë kundër nesh. Megjithatë ne kemi ligjin dhe drejtësinë në anën tonë. Edhe më e rëndësishme se kaq, ata nuk e kuptojnë se sa e fortë është dashuria për lirinë dhe sa fort mund ta ruash, pavarësisht presioneve. Rroftë Serbia”, ka shkruar Vuçiq në Instagram.
Vuçiq akuzoi Kurtin për një fushatë brutale dhe të pistë kundër Serbisë për disa ditë. Ai deklaroi se asaj i janë bashkuar edhe disa politikanë dhe analistë.
“E kërcënojnë Serbinë, na kujtojnë kohët e vjetra, flasin për luftën e tyre për liri, duke harruar se serbët luftuan për liri jo vetëm kundër terroristëve, por edhe kundër agresorëve të NATO-s, dhe siç tha ai, gjaku i derdhur nuk kthehet më, liria nuk mund të kthehet dhe nuk duhet të harrohet… Këtë do ta mbaj parasysh sonte”, tha presidenti i Serbisë.
