Që nga fundi i muajit gusht në Shqipëri është rritur ndjeshëm numri i rasteve të të infektuarve me koronavirus.
Drejtori i njërës prej qendrave shëndetësore në Tiranë, Besar Hysi, tha se çdo ditë ka pacientë që kërkojnë ndihmë mjekësore dhe realizimin e testit të shpejtë.
Ai për Euronews Albania deklaroi se 40% e testeve dalin pozitive.
“Kemi vënë re një shtim të rasteve me COVID, një nga arsyet ka qenë shtimi i turistëve. Kemi që javën e parë të shtatorit rritje të kryerjes së testeve. 20-25 në ditë dhe nga këto 7-10 dalin pozitivë. Numri mund të jetë pak më i madh se jo të gjithë bëjnë testin”, tha Hysi.
Mjekët thonë se deri më tani simptomat zgjasin mesatarisht 5 ditë, dhe se janë të lehta, prandaj asnjëri nga pacientët nuk është i shtrirë në spital.
Shumica e të prekurve janë mbi moshën 40-vjeçare, por ka edhe raste të fëmijëve të vegjël.
Mjekët mendojnë se me uljen e temperaturave, numri i të infektuarve do të vijë në rritje.
Ndërsa aktualisht në qarkullim janë nënvariantet e omikron, por ka edhe viruse të tjera sezonale.
