Ambasadori serb në SHBA, Marko Gjuriq, në një postim të tij në X ka thënë se janë katër serbë të vrarë nga grupi terrorist që sot sulmoi Policinë e Kosovës – ndryshe prej informacionit zyrtar të Policisë së Kosovës, e cila deri më tani ka raportuar për tre të vrarë. Po ashtu, edhe presidenti i Serbisë, Aleksandar Vuçiq, kishte thënë në konferencë për media për tre të vrarë.
Gjuriq vazhdoi retorikën e Vuçiqit, duke thënë se Kurti është përgjegjës për ngjarjen e sotme.
“Albin Kurti mban përgjegjësi për gjakderdhjen e sotme në veri të Kosovës. Serbia dënon pa mëdyshje dhunën në të cilën u vranë së paku katër serbë dhe një shqiptar i Kosovës (të paktën dy serbë u vranë nga zjarri snajper) dhe bën thirrje për veprim urgjent nga bashkësia ndërkombëtare. Ngushëllimet e mia të sinqerta për familjet e viktimave dhe të gjithë të prekurve nga kjo tragjedi. Gjakderdhja në veri të Kosovës është një tragjedi që ka mundur dhe është dashur të parandalohet”, ka pretenduar Gjuriq.
Gjuriq vazhdoi propagandën e tij se institucionet e Kosovës kanë “përndjekur qytetarët serbë të Kosovës”.
“Regjimi i Kurtit dhe ekstremistët e tij janë përfshirë në më shumë se 61 bastisje të paligjshme në zonat me shumicë serbe, kanë shkaktuar ose kryer 51 incidente të motivuara etnikisht dhe kanë kryer 22 lëvizje të mëdha përshkallëzuese. Gjatë gjashtë muajve të fundit shtatë civilë serbë janë qëlluar nga forcat e Kurtit, duke përfshirë fëmijë”.
Gjuriq është munduar që mesazhin e tij t’ua dërgojë edhe mediave prestigjioze ndërkombëtare, duke i përmendur poshtë postimit të tij.
