Drejtori i përgjithshëm i Policisë së Kosovës, Gazmend Hoxha, ka folur sërish për provat e autoriteteve në Kosovë lidhur me përfshirjen e Serbisë në sulmin terrorist në Banjskë, ku mbeti i vdekur rreshteri policor, Afrim Bunjaku.
Hoxha tha se Kosova ka fakte, të cilat dëshmojnë se shteti i Serbisë dhe Ushtria e Serbisë i kanë dhënë mbështetje të plotë ish-nënkryetarit të Listës Serbe, Millan Radoiçiq, i cili ka organizuar dhe ka marrë pjesë në sulmin ndaj Policisë së Kosovës më 24 shtator.
Siç tha ai, qëllimi i tyre ka qenë të krijohet një realitet i ri në Kosovë.
Hoxha bëri të ditur se po hetohet edhe përfshirja e mundshme e disa personave që mund të jenë nga Rusia.
Gjatë intervistës në REL, Hoxha foli edhe për bashkëpunimin me KFOR-it gjatë sulmit në veri, si dhe sfidat në monitorimin e vijës kufitare mes Kosovës dhe Serbisë.
