Një komandant i lartë i NATO-s tha të martën se aleanca e pajisi forcën e saj paqeruajtëse në Kosovë me armë të “fuqisë luftarake” pas një shkëmbimi zjarri të kohëve të fundit midis serbëve të maskuar e të armatosur dhe policisë së Kosovës që la katër persona të vdekur dhe ngriti tensionet në rajon.
Admirali Stuart B. Munsch i Komandës së Forcave të Përbashkëta Aleate në Napoli, Itali tha se një batalion prej rreth 200 trupash nga Mbretëria e Bashkuar dhe 100 të tjerë nga Rumania “po sjell armatim më të rëndë në mënyrë që të ketë fuqi luftarake për” KFOR-in, por nuk ka dhënë më shumë detaje, raporton AP.
Paqeruajtësit e KFOR-it — të përbërë nga rreth 4,500 trupa nga 27 vende — kanë qenë në Kosovë që nga qershori 1999, kryesisht me armatim të lehtë dhe automjete.
Më 24 shtator, rreth 30 persona të armatosur serbë vranë një oficer policie kosovar dhe më pas u barrikaduan në një manastir në Banjskë të Zveçanit përpara se të nisnin një betejë të armatosur disa orëshe me policinë e Kosovës. Tre persona të armatosur u vranë.
NATO fillimisht kishte shtuar trupat e saj me rreth 600 turq pas përleshjeve të 29 majit me serbët etnikë.
Munsch tha se aleanca ishte gati të shtonte më shumë trupa dhe armatime për të ruajtur paqen.
“NATO po mban forca të mëtejshme të pajisura me armatim edhe më të rëndë të aftë për fuqi të mëtejshme luftarake në një gjendje të lartë gatishmërie që mund të vendoset nëse vendet e NATO-s vendosin ta bëjnë këtë”, tha ai.
Komandanti në largim i KFOR-it, gjeneralmajor Angelo Michele Ristuccia tha se KFOR-i mbështet plotësisht dialogun e ndërmjetësuar nga BE midis Prishtinës dhe Beogradit për normalizimin e lidhjeve të tyre.
“Situata mbetet e paqëndrueshme dhe lehtë mund të përshkallëzohet. Vetëm një zgjidhje politike mund të sjellë një paqe dhe stabilitet të qëndrueshëm në zonë”, tha ai Ristuccia.
