Qeveria e Kosovës, në mbledhjen e mbajtur të enjten, ka aprovuar vendimin për ndarjen buxhetore për të subvencionuar ndërtimin e shtëpive për komunitetet joshumicë që jetojnë në Kosovë.
Kryeministri Kurti, para kabinetit qeveritar tha se projekti ka filluar tri vite më parë nga ish-Ministria e Punës dhe Mirëqenies Sociale.
Ministri i Financave, Hekuran Murati, shtoi se një pjesë e madhe e shtëpive që kishin nisur të ndërtoheshin kanë mbetur në gjysmë.
“Për shkak të problemeve që ka pasur qysh në dizajn të projektit dhe pastaj në mbarëvajtje të punëve, është ndërprerë dhe kemi një situatë të trashëguar e kësisoj një pjesë e madhe e këtyre shtëpive të cilat kanë nisur të ndërtohen kanë mbetur në gjysmë”.
“Në mënyrë që të mundësohet përfundimi i punëve, ne kemi marrë parasysh nevojën për të mbështetur pjesën e mbetur që ka qenë e paraparë me kontratë në mënyrë që familjet të kenë mundësi që t’i kryejnë vet këto investime me mbështetjen e Qeverisë”, u shpreh Murati.
