Kryeministri i Shqipërisë, Edi Rama, gjatë pjesëmarrjes në Forumin e Paqes në Paris ka thënë se vërehet një model shqetësues, një angazhim i keq për të shkaktuar konflikte dhe për të mbjellë kaos në hemisferën veriore, përfshirë Ballkanin Perëndimor.
Sipas tij, këta agjentë të kaosit duhet të ndalen dhe të mposhten.
“Në Forumin e Paqes në Paris pata rastin të takoj liderë dhe zyrtarë të ndryshëm. Në Gaza, ne të gjithë biem dakord se konflikti dhe vuajtjet e tmerrshme që ai shkakton duhet të marrin fund”, ka thënë Rama.
“Si një anëtar i përkushtuar i NATO-s, ne shohim një model shqetësues, një angazhim të keq për të shkaktuar konflikte dhe për të mbjellë kaos në hemisferën veriore, përfshirë Ballkanin Perëndimor. Këta agjentë të kaosit duhet të ndalen dhe të mposhten”, ka shtuar Rama në platformën X.
Tutje, ai ka thënë se zgjatja e vuajtjeve të civilëve në Gaza vetëm ushqen ambiciet e Hamasit dhe agjentëve të tjerë të kaosit.
“Ndihem i inkurajuar nga përkushtimi i mikpritësit tonë këtu në Paris, Presidentit Macron të Francës, i cili, të shtunën, më 10 nëntor, bëri thirrje për një armëpushim të menjëhershëm. Jam dakord me vlerësimin e Presidentit Macron se nga një armëpushim do të përfitonte gjithashtu edhe Izraeli”, ka potencuar kryeministri shqiptar.
“Si një vend paqësor dhe me shumë religjione, me një rini të gjallë, një fund i menjëhershëm i vuajtjeve të civile të popullit palestinez dhe izraelit dhe një paqe e qëndrueshme midis këtyre dy kombeve është me interes strategjik për Shqipërinë”, ka potencuar ai.
Në fund ai ka thënë se do të vazhdojë të punojë me udhëheqës të tjerë dhe zyrtarë të tjerë për arritjen e paqes.
