Pakënaqësitë me faturat e larta të energjisë elektrike, qytetarët i kanw shfaqur vetëm në rrjete sociale. Asnjë prej tyre nuk i është drejtuar Zyrës së Rregullatorit për Energji. Ankesave të qytetarëve u është përgjigjur KESCO, me një reagim. Sipas tyre, rritja e vlerës se faturave në ketë muaj është rezultat i rritjes së konsumit të energjisë elektrike, veçanërisht te konsumatorët që e përdorin energjinë elektrikë për ngrohje. Kanë përmendur edhe që vitin e kaluar, janë subvencionuar qytetarët që kursejnë, si dhe që ata që shpenzojnë mbi 800 kilovatë faturohen me tarifë më të lartë.
Rrjetet sociale janë mbushur që nga dje me fatura të energjisë elektrike. Shumë konsumatorë janë ankuar se fatura e këtij muaji është shumë më e lartë se ajo paraprake, ndonëse thonë se kanë shpenzuar njëjtë.
Por, asnjë prej tyre nuk i është drejtuar deri tash Zyrës së Rregullatorit për Energji. Nga ZRRE thane se s’kanë ndonjë ankesë për faturimin e këtij muaji, derisa kanë inkurajuar qytetarët që për shqetësimet apo parregullsitë nëpër fatura, t’i drejtohen KESCO’s.
“ZRRE-ja, inkurajon të gjithë konsumatorët që ta kontaktojnë furnizuesin (KESCO), në qoftë se kanë shqetësime apo vërejnë parregullsi ne faturat e tyre. ZRRE-ja, ka një proces për ankesat e konsumatorëve që konsumatorët e përdorin gjatë gjithë kohës për zgjidhjen e çështjeve në lidhje me leximin e njehsorëve, faturimin, dhe çështje të tjera. Aktualisht, ZRRE-ja nuk ka pranuar ankesa te konsumatorëve për faturimin e këtij muaji”, thuhet në përgjigje.
Sa i përket faturave të këtij muaji, nga ky institucion thonë se në te gjitha faturat e energjisë elektrike janë duke u aplikuar çmimet e vendosura me vendimin e ZRRE’së, të 30 marsit.
“Çmimet e energjisë elektrike janë duke u aplikuar në te gjitha faturat e energjisë elektrike për energjinë e konsumuar sipas çmimeve te vendosura me datë 30 mars 2023 përmes vendimit V_1713_2023 nga Zyra e Rregullatorit për Energji. ZRRE-ja, fton të gjithë konsumatorët që të kursejnë energjinë elektrike, pasi që është e vetmja mënyrë që të mos aplikohet blloku tarifor mbi 800kWh”, thuhet në përgjigje.
Se faturat janë më të larta këtë muaj, e kanë pranuar edhe nga KESCO. Nga KESCO kanë thënë se rritja e vlerës se faturave në ketë muaj dimri është rezultat i rritjes së konsumit të energjisë elektrike, veçanërisht te konsumatorët që e përdorin energjinë elektrikë për ngrohje.
Në reagimin e ZRRE’së theksohet edhe se konsumimi i energjisë elektrike në vlerë më shumë se 800 kËh në muaj faturohet me tarifë më të lartë.
“KESCO njofton konsumatorët dhe opinionin publik që nuk ka pasur rritje të tarifave fundore. Tarifat e energjisë elektrike janë rishikuar dhe rritur afërsisht 15% krahasuar me tarifat 2022-2023, me vendim të ZRrE-së, më 1 prill 2023. Rritja e vlerës se faturave në ketë muaj dimri është rezultat i rritjes së konsumit të energjisë elektrike, veçanërisht te konsumatorët që e përdorin energjinë elektrikë për ngrohje. Shih Vendimin e ZRrE-së”, thuhet në njoftim.
Tjetër arsye thonë se është edhe që vitin e kaluar, Qeveria ka subvencionuar konsumatorët që kanë kursyer.
“ZRRE ka ndërtuar një strukturë tarifore të ndarë në blloqe shpenzuese. Kështu, nëse ju si konsumator familjar konsumoni deri në 800 kWh, atëherë i nënshtroheni vetëm dy blloqeve, ditën dhe natën, të cilat në dimër fillojnë nga ora 22:00 deri në orën 7:00. Gjatë ditës çmimi është 7.79 cent për kWh, ndërsa natën rreth 57 për qind më i lirë, pasi llogaritet me 3.34 cent për kWh. Megjithatë, çmimet ndryshojnë për konsum mbi 800 kWh. Nëse një konsumator konsumon 1600 kWh, atëherë pjesa deri në 800 kWh llogaritet me çmimet e lartpërmendura. Ndërsa pjesa e mësipërme llogaritet me 2 tarifa të tjera: ajo e larta gjatë ditës që shkon në 14.45 cent për kWh ose 85.5 për qind më shtrenjtë, dhe ajo e natës 6.81 cent për kËh ose gati 104 për qind më e shtrenjtë se shpenzimi nën 800 kWh”, thuhet tutje në njoftim.
Me reagim për këtë çështje ka dalë edhe Këshilli për Mbrojtjen e të Drejtave dhe Lirive të Njeriut.
Nga KMDLNJ i kanë quajtur si “jonormale” faturat e këtij muaji, derisa i kanë kërkuar Prokurorisë së Shtetit që të nis hetime urgjentisht, raporton Express.
“Faturat për rrymë të muajit dhjetor për shumicën e qytetarëve dallojnë shumë nga ato të muajit të kaluar, janë 100 % e më shumë më të larta. Në ndërkohë askush nuk ka njoftuar për rritje eventuale të çmimit të energjisë elektrike sikur që edhe temperaturat nuk kanë qenë të larta për të shpenzuar energji shtesë. Po në të njëjtën kohë serbët dhe banorët tjerë të veriut të Kosovës vazhdojnë të mos i paguajnë faturat për rrymën e shpenzuar sikur që rrymën e shpenzojnë pa asnjë kufizim. Qeveria e Kosovës në rastin konkret po zbaton standarde të dyfishta duke favorizuar serbët e veriut pasi ua paguan rrymën dhe duke i ndëshkuar konsumatorët e rregulltë me një rritje aq të madhe dhe për këtë as që ka reaguar”, thuhet në reagim.
