Washingtoni do t’i sigurojë Izraelit 3.5 miliardë dollarë (mbi 3 miliardë e 200 milionë euro) për t’i shpenzuar në armë dhe pajisje ushtarake amerikane, tha të premten Departamenti i Shtetit.
Një zëdhënës i Departamentit të Shtetit tha të premten se departamenti njoftoi Kongresin amerikan të enjten se qeveria synonte të lironte miliarda dollarë financime të huaja ushtarake për Izraelin.
Tensionet në Lindjen e Mesme janë rritur dhe shumë kanë frikë nga një zgjerim i luftës së Izraelit në Gaza, e cila tashmë ka vrarë dhjetëra mijëra dhe ka shkaktuar një krizë humanitare.
Ka pasur një rrezik në rritje të përshkallëzimit në një luftë më të gjerë në Lindjen e Mesme, pasi vrasjet e fundit të liderit të grupit palestinez të Hamasit, Ismail Haniyeh në Iran dhe të komandantit ushtarak të Hezbollahut, Fuad Shukr në Bejrut, tërhoqën kërcënime për hakmarrje kundër Izraelit.
Gjakderdhja e fundit në konfliktin izraelito-palestinez nisi më 7 tetor kur Hamasi sulmoi Izraelin, duke vrarë 1 mijë e 200 persona dhe duke marrë rreth 250 pengje , sipas të dhënave izraelite, shkruan Reuters
Ministria e shëndetësisë së Gazës thotë se që nga ajo kohë sulmi ushtarak i Izraelit në enklavën e qeverisur nga Hamasi ka vrarë afro 40 mijë palestinezë, ndërkohë që ka zhvendosur pothuajse të gjithë popullsinë prej 2.3 milionë banorësh, duke shkaktuar një krizë urie dhe duke çuar në akuza për gjenocid që Izraeli i mohon.
