Kryetari i Komunës së Podujevës, Shpejtim Bulliqi, ka deklaruar se në 34-vjetorin e shpalljes së Kushtetutës së Kaçanikut, të shtunën më 7 shtator, në Podujevë do të bëhet përurimi i shtatores së ish-presidentit të Kosovës, Ibrahim Rugova, raporton Gazeta “Enigma”.
“Kjo shtatore e cila është financuar me buxhetin e Komunës së Podujevës do të vendoset në Parkun e Qytetit, afër ish-objektit të administratës komunale”, tha Bulliqi.
Kryetari i Podujevës thotë se me vendosjen e kësaj shtatoreje “ne po nderojmë një nga figurat më të shquara të kombit tonë, Presidentin Ibrahim Rugova, si simbol të qëndresës, urtësisë dhe vizionit për një Kosovë të lirë dhe të pavarur”.
Në ceremoninë e përurimit do të marrin pjesë zyrtarë të lartë shtetërorë, bashkëpunëtorë të ish-Presidentit Rugova, familjarë të tij dhe qytetarë nga treva e Llapit e gjitha trevat shqiptare. /Gazeta Enigma/
