Paneli për Lirim me Kusht më 7 gusht kishte vendosur që ta lironte me kusht Premtim Gashin, që ishte në burg për shkaktim të rrezikut të përgjithshëm dhe armëmbajtje pa leje. Vendimi për lirimin e tij ishte marrë 8 muaj e 19 ditë para përfundimit të dënimit.
Gashi u vra më 1 shtator nga të shtënat në një shkëmbim zjarri që ndodhi mes dy grupeve në lagjen “Aktash” në Prishtinë.
Sipas vendimit për të cilin ka raportuar ‘Betimi për Drejtësi’, thuhet se Premtim Gashi do të lirohej nga 13 gushti 2024 dhe do të ishte në mbikëqyrje të Shërbimit Sprovues të Kosovës deri më 26 prill 2025.
Po ashtu, me aprovimin e kërkesës së Gashit për lirim me kusht, i njëjti ishte obliguar që brenda pesë ditëve nga data e lirimit nga institucioni korrektues, të lajmërohet në Drejtorinë Rajonale të Policisë së Kosovës dhe në Shërbimin Sprovues nën disa kushte.
“1.të raportojë rregullisht në Shërbimin Sprovues deri me datën 26.04.2025; 2.në rast të ndërrimit të vendbanimit të njoftojë Policinë dhe Shërbimin Sprovues; 3.të mos tentojë që të udhëtojë jashtë shtetit, pa miratimin e Panelit për Lirim me Kusht; 4.të jetë më i kujdesshëm me sjelljet e tij në të ardhmen”, thuhet në vendimin e PLK-së.
Fillimisht, në vendim të Panelit theksohet se Gashi ishte shpallur fajtor dhe dënuar me 1 vit burgim dhe 500 euro gjobë nga Gjykata Themelore në Prishtinë për veprat penale: “Shkaktim i rrezikut të përgjithshëm” dhe “Mbajtja në pronësi, kontroll ose posedim të paautorizuar të armëve”.
Mirëpo, Apeli ia kishte ashpërsuar dënimi duke e rritur lartësinë e tij për gjashtë muaj, pra në total duke e dënuar me 1 vit e gjashtë muaj dhe me 1 mijë euro gjobë.
Këtë vendim të Apelit, e kishte vërtetuar edhe Supremja duke hedhur poshtë kërkesën për zbutje të dënimit ndaj Gashit.
Më pas, thuhet se në seancën e Panelit ishte shqyrtuar raporti përmbledhës i ekipit profesionist të Shërbimit Korrektues të Kosovës dhe pas vlerësimit të të dhënave të paraqitura në këtë raport, Paneli ka gjetur se Gashi është i dënuar me 1 vit e gjashtë muaj burgim dhe se i kanë mbetur edhe 8 muaj e 19 ditë burgim.
“Në raportin ligjor për të dënuarin vërtetohet se të dënuarit, data e përfundimit të dënimit është 26.04.2025 dhe nga llogaritja e dënimit, rezulton se të dënuarit nga dënimi me burgim prej 1 vit e 6 muaj, i kanë mbetur edhe 8 muaj e 19 ditë, të cilat do të mbikëqyren dhe kontrollohen nga Shërbimi Sprovues i Kosovës”, thuhet në vendimin e Panelit.
Sipas këtij vendimi, nga raportet e përpiluara nga ekipi i Qendrës Korrektuese, rezulton se Gashi kishte treguar sjellje të mirë, ishte ulur rrezikshmëria për recidivizëm, se kishte pranuar që është penduar për veprën, duke deklaruar se kanë arritur pajtim me familjen e të dëmtuarit. Më tej, ai ekip kishte vlerësuar se i dënuari ka shfaqur elemente pozitive të risocializimit.
Paneli gjatë seancës konstatoi se nuk ka të dhëna për shkelje disiplinore, se është angazhuar në punë dhe se si Panel kanë marrë për bazë edhe premtimin që Gashi u kishte dhënë zyrtarëve të Shërbimit Sprovues se do të bashkëpunojë me ta deri në përfundimin e mbikëqyrjes së lirimit me kusht.
Gjithashtu, Paneli kishte vlerësuar se i njëjti me një mbikëqyrje efektive do të ri-integrohej në familje e në shoqëri në pajtim me ligjin dhe se koha e kaluar në burg sipas Panelit ka arritur qëllimin e dënimit sipas Ligjit për Ekzekutimin e Sanksioneve Penale.
Në fund, Paneli kishte vendosur që Gashi të lirohej me kusht me datën 13 gusht 2024 në ora 16:00 nën kushtet e lartrpërmendura.
Por, vetëm 19 ditë pasi u lirua, ai mbeti i vdekur nga të shtënat me armë në “Aktash” – në Prishtinë. Nga të shtënat u plagosën pesë persona. Të gjithëve u është caktuar masa e paraburgimit prej një muaji.
