Në Strasburg të Francës, më 18 shtator, është nënshkruar dekret-rregullorja për heqjen e vizave për mbajtësit e pasaportës që e lëshon për serbët e Kosovës, e ashtuquajtura Drejtoria koordinuese në Beograd.
Dekreti u nënshkrua nga presidentja e Parlamentit Evropian (PE), Roberta Metsola dhe ministri i Çështjeve Evropiane të Hungarisë, Janosh Boka, si përfaqësues i vendit që kryeson Këshillin e BE-së.
Poseduesit e këtyre pasaportave nuk ishin përfshirë në liberalizimin e vizave që BE-ja e bëri me shtetin serb në vitin 2009.
Sot vendimi është publikuar në Gazetën Zyrtare të BE-së.
Më 22 korrik të këtij viti, Këshilli i BE-së mori vendim për heqjen e vizave për ata që janë shtetas të Kosovës e që kanë pasaporta të Serbisë, të lëshuara nga Drejtoria Koordinuese, kjo duke i dhënë fund procesit legjislativ për këtë çështje në BE.
Më 23 korrik, kryeministri i Republikës së Kosovës, Albin Kurti, tha mes tjerash se këtë vendim e konsiderojnë “të dëmshëm, të padrejtë dhe dekurajues për integrimin e serbëve”.
