Opinionisti Rrahman Paçarizi, ka deklaruar se shteti i Kosovës nuk e ka shfrytëzuar politikisht sulmin e 24 shtatorit në Banjskë të Zveçanit, i cili ka theksuar tutje se Kosova është dashur ta kapitalizonte këtë rast, pasi bëhej fjalë për agresion të shtetit Serb mbi Kosovën, raporton Gazeta “Enigma”.
“Kjo ka qenë një fatkeqësi sepse ka qenë diçka shumë e rrezikshme që ka mundur t’i ndodhë shtetit të Kosovës, por është shndërru në fitore edhe duke iu falënderuar punës dhe profesionalizmit të Policisë së Kosovës, por unë mendoj se politikisht nuk është shfrytëzuar, nuk po them që të përfitohet mbi një situatë të caktuar, por ky ka qenë agresion i Serbisë ndaj Kosovës, prandaj Kosova e ka pasur të drejtën edhe morale çdo të drejtë tjetër që ta kapitalizonte këtë rast kur arriti ta zmbrapste një agresion nga Serbia”, tha Paçarizi në Rubikon të Klan Kosovës.
Tutje ai ka shtuar se politika kosovare e përdori sulmin në Banjskë në planin e brendshëm, në vend se atë ta përdorte në planin ndërkombëtar, për t’i bindur shtetet tjera që t’i vendosin sanksione Serbisë.
“Politika jonë u përpoq që…e degradoi nivelin e asaj që duhej të ndodhte, përfitimi këtu do duhej të kishte qenë në planin ndërkombëtar, jo në planin e brendshëm, sepse në planin e brendshëm të gjithë qytetarët e Kosovës edhe e kanë pasur shqetësimin që ka ndodhur ky sulm por edhe krenarinë që Kosova e ka fituar në betejë kaq të rrezikshme.
Presioni që i bëhej prokurorisë për t’u ngutur ka qenë krejt i panevojshëm, sepse ata politikanë nuk e njohin çështjen e procedimit të një aktakuze, kjo është punë e profesionistëve, këtë e dinë vetëm profesionistët dhe për ta përgatitur një aktakuzë të tillë ka pasur nevojë për kohë”, tha Paçarizi.
