Presidenti i Serbisë, Aleksandar Vuçiq ka folur sot në debatin e përgjithshëm të sesionit të 79-të të Asamblesë së Përgjithshme të Kombeve të Bashkuara (OKB), ku u mblodhën më shumë se 140 liderë botërorë dhe përfaqësues shtetërorë.
Nga atje ai ka akuzuar shtetet e mëdha demokratike.
Në fjalën e tij, Vuçiq ka thënë se perëndimi ka shkelur ligjet ndërkombëtare në rastin e Kosovës, teksa ka lexuar edhe Rezolutën 1244 të KS të OKB-së për Kosovën.
Vuçiqi i quajti “agresorë” shtetet perëndimore, të cilat vazhdojnë të mbështesin Kosovën e pavarur.
“Ata që kryen agresion ndaj Serbisë, që tentojnë të ndajnë një pjesë të territorit të saj, ende tentojnë të na bindin se e vetmja zgjidhje demokratike dhe e arsyeshme është ndarja e Kosovës dhe Metohisë nga Serbia dhe po i ofrojnë armatim çdo ditë asaj që vetëquhet sot e ashtuquajtur Forcë e Armatosur e Kosovës dhe ajo që nesër do të bëhet Forcë e Armatosur e Shqiptarëve në territorin e Serbisë”, tha ai.
Tutje presidenti serb shtoi se ka pyetur ndërkombëtarët se në bazë të çfarë dokumenti ndërkombëtar e bëni këtë, dhe thotë se merr përgjigjen, sipas tij “më budallallëqe të mundshme në botë”.
“Ne nuk e pranojmë kartën e OKB-së dhe Rezolutën, sepse për ne situata ka ndryshuar, sepse e kemi njohur pavarësinë e Kosovës 15 vjet më parë”, u shpreh ai.
Më tej, Vuçiq, kërkoi ndihmë nga shtetet “mike” siç i quajti ai, e jo nga “shtetet kukulla e satelite”.
“Çfarë mund të bëjmë ne si shtet i vogël, si të luftojmë? Sepse të gjithë në botë flasin për Ukrainën, e askush për Serbinë. Por edhe nëse flasin, thonë se po duam të nisim një luftë në Ballkan me urdhër të Rusisë. Kanë gënjyer për dy vjet e gjysmë”.
“Nuk jemi shërbëtorë as të Rusisë e as të ShBA-së”, tha ai, teksa mori duartrokitje nga hiç më pak se ish-ambasadori i Serbisë në ShBA, tash ministri i Jashtëm, Marko Gjuriq.
Ndër të tjera, Vuçiq foli edhe për dialogun me Kosovën nën lehtësimin e BE-së, për çka tha se vendi i tij është i përkushtuar që ta vazhdojë.
“Do të mbesim të përkushtuar në dialogun me Prishtinën, dhe do të luftojmë të ruajmë paqen”, deklaroi Vuçiqi në fjalën e tij. /Gazeta Enigma
