Kryeministri i Kosovës, Albin Kurti, vizitoi konferencën vjetore DokuTech, që po mbahet në hapësirat e TechPark, në Bernicë.
Këtë vit kjo konferencë po shënon edicionin e saj të 11-të, si një nga ngjarjet kryesore të teknologjisë dhe inovacionit në Kosovë.
Në komunikatën për media thuhet se në kuadër të kësaj ngjarjeje, Kurti është takuar dhe bashkëbiseduar me nxënës dhe studentë që kanë prezantuar projektet e tyre.
“Konferenca DokuTech mbledh liderë të mendimit, teknologë, inovatorë dhe ndërmarrës nga Kosova dhe jashtë vendit për të hulumtuar dhe diskutuar ndërthurjen e teknologjisë, kulturës dhe ndryshimeve sociale”.
“Në kuadër të kësaj ngjarjeje, kryeministri Kurti vizitoi aktivitetin DIY (Do It Yourself), ku pati rastin të takojë dhe bashkëbisedojë me nxënës dhe studentë të talentuar që prezantuan projektet e tyre inovative në teknologji moderne, si inteligjenca artificiale, robotika dhe realiteti virtual/augmentar”.
“Nga ky edicion, DokuTech është bërë pjesë e nismës OctoberTech, e cila përfshin edhe KOSICT dhe GroëthTank, duke e vendosur atë brenda një kuadri më të madh të ngjarjeve teknologjike të mbështetura dhe bashkëfinancuara nga Qeveria e Kosovës. Kjo nismë synon të nxisë zhvillimin digjital dhe teknologjik të vendit, si dhe të mbështesë potencialin e sektorit të Teknologjisë së Informacionit për rritje dhe eksport”, thuhet në komunikatë.
