Bitcoin ka arritur një rekord të ri, duke kapur vlerën prej 75,000 dollarësh pas fitores së ish-presidentit Donald Trump në zgjedhjet e fundit.
Ky sukses ka nxitur një valë entuziazmi midis investitorëve të kriptovalutave, të cilët e panë Trumpin si një mbështetës të fuqishëm të industrisë së monedhave dixhitale. Gjatë fushatës së tij, ai kishte premtuar se do ta bënte SHBA-në “kryeqytetin e kriptove në botë”, shkruan Gazeta Enigma.
Në tregtimet e mëngjesit të hershëm, Bitcoin regjistroi një rritje prej afro tetë për qind, duke thyer kështu rekordin e mëparshëm që ishte arritur në mars. Kriptovalutat e tjera gjithashtu ndoqën këtë prirje pozitive: Ether, kriptomonedha e dytë më e madhe në botë, u rrit me 8 për qind, ndërsa Dogecoin, i preferuari i miliarderit Elon Musk, shënoi një rritje prej 18 për qind.
Ndryshimi i qëndrimit të Trump ndaj kriptovalutave gjatë fushatës, i raportuar nga Newsweek, ka kontribuar ndjeshëm në këtë rritje. Dikur skeptik ndaj kriptove, Trump tani ka përqafuar industrinë dhe ka propozuar krijimin e një “rezervë strategjike” të Bitcoin-it, të ngjashme me rezervën e arit të SHBA-së, duke e bërë Bitcoin një pjesë të rëndësishme të politikës financiare të vendit./GazetaEnigma/
