Imazhet satelitore të publikuara së fundmi nga transmetuesi suedez SVT në bashkëpunim me Planet Labs kanë zbuluar një përshkallëzim të dukshëm të pranisë ushtarake ruse pranë kufirit me Finlandën – në një kohë të ndjeshme pas zgjerimit të NATO-s.
Sipas analizave, Moska ka ndërmarrë hapa për ndërtimin e infrastrukturës ushtarake në katër baza të rëndësishme: Kamenka, Petrozavodsk, Severomorsk-2 dhe Olenya. Në Kamenka, vetëm 35 milje larg kufirit me Finlandën, janë ngritur mbi 130 tenda ushtarake që mund të strehojnë deri në 2,000 trupa, që nga shkurti i këtij viti.
Ndërkohë, në Petrozavodsk, afërsisht 100 milje nga kufiri, janë ndërtuar tre depo të mëdha të cilat besohet se do të shërbejnë për ruajtjen e automjeteve të blinduara. Në Severomorsk-2, një bazë ajrore e mbyllur më parë, imazhet tregojnë se ajo është rikthyer në funksion, me helikopterë të parkuar pranë pistës. Kjo bazë ndodhet rreth 110 milje nga kufiri me Finlandën dhe më pak se 70 milje nga Norvegjia.
Gjithashtu, baza ajrore Olenya, që ndodhet 90 milje larg kufirit finlandez, sipas informacioneve të autoriteteve ukrainase, është përdorur nga bombarduesit rusë për të kryer sulme ndaj objektivave në Ukrainë.
Këto zhvillime janë parë si një përgjigje e drejtpërdrejtë ndaj anëtarësimit të Finlandës në NATO më 4 prill 2023, që ka zgjatur kufirin e aleancës me Rusinë me mbi 800 milje. Kremlini në atë kohë kishte kërcënuar me “masa reagimi ushtarako-teknike”.
“Kur aplikuam për anëtarësim në NATO, Rusia tha se do të ndërmerrte hapa të tillë. Tani po e shohim këtë të ndodhë”, deklaroi Michael Claesson, shefi i Mbrojtjes së Suedisë.
