Një valë e re sulmesh raketore nga Irani ka goditur qytete të ndryshme në Izrael, përfshirë Tel Avivin dhe Haifën, duke shkaktuar dëme të mëdha në infrastrukturë dhe plagosjen e disa personave.
Sipas shërbimeve izraelite të emergjencës, një raketë iraniane ka goditur rëndë një zonë të banuar në Tel Aviv, duke dëmtuar disa ndërtesa dykatëshe dhe duke shembur pjesërisht të tjera. Pamjet nga vendngjarja tregojnë rrënoja dhe dëme të mëdha materiale.
Agjencia e emergjencës Magen David Adom (MDA) raportoi se 11 persona janë plagosur, përfshirë një burrë në gjendje të moderuar me plagë nga shrapneli dhe të tjerë me lëndime më të lehta.
Forcat e Kërkim-Shpëtimit janë dislokuar në mbi 10 vendndodhje në të gjithë vendin, ku janë raportuar goditje të drejtpërdrejta nga raketat. Policia izraelite dhe njësitë e çminimit janë gjithashtu aktive në terren për të garantuar sigurinë e banorëve.
Ky është sulmi i parë i drejtpërdrejtë i Iranit ndaj Izraelit që pas bombardimeve të Shteteve të Bashkuara ndaj centraleve bërthamore iraniane.
