Presidentët Donald Trump dhe Volodymyr Zelensky do të zhvillojnë një bisedë telefonike të premten për të diskutuar vendimin e Pentagonit për ndalimin e furnizimeve të disa armëve të avancuara për Ukrainën.
Biseda vjen pas një vendimi të papritur nga SHBA për të ndërprerë disa dërgesa me armë, duke përfshirë sisteme anti-raketë Patriot, për të cilat Ukraina ka lobuar gjatë takimeve të fundit, përfshirë samitin e NATO-s, raportoi Financial Times.
Burimet thonë se Zelensky pritet të kërkojë më shumë informacione dhe mundësitë për shitje të tjera të armëve për Ukrainën. Sipas raportimeve, Shtëpia e Bardhë dhe Zyra e Presidentit të Ukrainës ende nuk kanë komentuar rreth bisedës telefonike.
Vendimi i Pentagonit ka shqetësuar qeverinë ukrainase, e cila kërkoi sqarime nga diplomati i lartë amerikan pas ndalimit të dërgesave.
Trump, që ka përshkruar marrëdhënien me Zelenskyn si “shumë të këndshme”, pritet të sqarojë këtë vendim gjatë bisedës.
