Pas letrës që i kanë dërguar kryeministrit në detyrë Albin Kurtit, Sindikata e Punëtorëve të RTK-së i ka drejtuar një letër publike edhe Kuvendit të Kosovës.
Në njoftimin e lëshuar për media thuhet se duhet të alokohen sa më shpejt mjetet për të paguar punëtorët e RTK-së, transmeton Klankosova.tv.
“Si pasojë, RTK ndodhet në bllokim total, ndërsa 700 punëtorë janë pa paga, duke u përballur me një situatë sociale dhe ekonomike alarmante. Gjendja aktuale përbën kolaps të plotë institucional dhe njerëzor,” thuhet në letër.
Letra e plotë:
Të nderuar përfaqësues të Kuvendit të Republikës së Kosovës,
Kryesia e Sindikatës së Punëtorëve të RTK-së ju njofton se aktualisht në Radio Televizionin e Kosovës është krijuar një situatë e rëndë institucionale dhe funksionale.
Pozita e Drejtorit të Përgjithshëm të RTK-së është e zbrazët, ndërsa ushtruesit të detyrës së kësaj pozite i ka skaduar mandati që nga e premtja e kaluar. Përveç kësaj, Bordi i RTK-së nuk është i kompletuar, gjë që e bën të pamundur çdo vendimmarrje ligjore dhe administrative.
Si pasojë, RTK ndodhet në bllokim total, ndërsa 700 punëtorë janë pa paga, duke u përballur me një situatë sociale dhe ekonomike alarmante. Gjendja aktuale përbën kolaps të plotë institucional dhe njerëzor.
Kërkojmë nga Kuvendi i Republikës së Kosovës që të ndërmarrë masa urgjente për zgjidhjen e kësaj gjendjeje dhe për të siguruar funksionimin e ligjshëm dhe të pandërprerë të RTK-së, në përputhje me ligjin dhe me përgjegjësinë publike ndaj qytetarëve.
Me respekt,
KRYESIA E SINDIKATËS SË PUNËTORËVE TË RTK-së (SPERTK).
