Irani ka ndërmarrë masa për të parandaluar protestat kundër qeverisë, duke vendosur pika të shumta kontrolli në rrugët e kryeqytetit dhe duke rritur praninë e forcave të sigurisë.
Banorë të Teheranit kanë treguar për BBC-në se në qytet janë vendosur pika të reja kontrolli të sigurisë, ku sipas tyre qytetarët ndalohen dhe kontrollohen.
Ata i kanë thënë BBC Persian se disa nga këto pika janë vendosur nën mbikalime për këmbësorë dhe brenda tuneleve rrugore, pasi sipas raportimeve disa pika kontrolli të vendosura në mes të rrugëve janë sulmuar me dronë.
Sipas agjencisë së lajmeve Fars News Agency, disa pjesëtarë të forcave iraniane të sigurisë janë vrarë në sulmet izraelite ndaj katër pikave të kontrollit në Teheran më 11 mars.
Fars raportoi se sipas të dhënave jozyrtare rreth 10 pjesëtarë të forcave të sigurisë janë vrarë në sulmet që ndodhën në katër distrikte të kryeqytetit.
Një i ri rreth të njëzetave i tregoi BBC-së mënyrën se si përpiqet të kalojë nëpër pikat e kontrollit, duke thënë se një herë ishte ndaluar dhe makina e tij ishte kontrolluar.
“Fillova t’u thosha gjëra si: ‘Faleminderit për punën tuaj’, sikur ata po bënin një punë të madhe dhe unë e vlerësoja”, tha ai.
Pas kontrollit, sipas tij, forcat e sigurisë e lanë të vazhdonte rrugën.
Ndërkohë, një grua gjithashtu në të njëzetat tha se tashmë ka ndryshuar mënyrën e veshjes nga frika e patrullave.
“Zakonisht vesh rroba me ngjyra të forta, por tani nuk e bëj më. Kam frikë nga patrullat e tyre dhe druhem se nëse vesh diçka shumë të ndezur mund t’i irritoj”, tha ajo për BBC.
