Qeveria e Shqipërisë të premten ka marrë vendim ta ulë me 20 për qind akcizën e naftës dhe benzinës në raste të caktuara, ka njoftuar ministri i Financave, Petrit Malaj.
Ulja e akcizës prej 20 për qind do të zbatohet në raste kur çmimi shkon përtej 220 lekë për litër për naftë dhe 200 lekë për litër për benzinë.
Ulja e akcizës do të jetë në fuqi deri në stabilizimin e situatës, raporton TopChannel.
Vendimi vjen pak orë para mbledhjes së Bordit të Transparencës, ku pritet të ketë rritje të çmimit të naftës. Aktualisht, në Shqipëri çmimi është rreth 210 lekë për litër për dhe 190 lekë për litër për benzinë.
Bordi i Transparencës në Shqipëri është një strukturë e krijuar me qëllim mbikëqyrjen, kontrollin dhe sigurimin e transparencës në lëvizjet e çmimeve të naftës dhe benzinës. Bordi përcakton çmimet bazuar në tregun global.
Njoftimi i Malajt:
Ashtu sikundër Kryeministri Rama ka premtuar që në krye të herës, për të marrë masa konkrete dhe të prekshme për të amortizuar efektet e prodhuara si rezultat i konfliktit në Iran, qeveria shqiptare sot ka ndërmarrë Aktin Normativ për të ulur akcizën, si rrjedhojë e rritjes së çmimit të naftës në tregjet ndërkombëtare, sidomos në 48 orët e fundit.
Ky Akt Normativ parashikon uljen e akcizës me 20%, nëse rast se çmimi i shitjes me pakicë, i përcaktuar nga Bordi i Transparencës do të jetë:
Mbi 220 lekë për litër për naftën;
Mbi 200 lekë për litër për benzinën.
Ky Akt Normativ do të jetë në fuqi deri në stabilizimin e plotë të situatës të krijuar ndërkombëtarisht.
Ne jemi të angazhuar plotësisht që t’i përgjigjemi me përgjegjshmëri çdo sfide, duke mbrojtur qytetarët shqiptarë nga efektet financiare të prodhuara si rezultat i këtij konflikti, por edhe të mbrojmë buxhetin e shtetit dhe ekonominë e vendit tonë, sidomos në një moment kritik si ky që po përballet bota sot.
