Vetëm pak javë më parë, Gianni Infantino e festonte me krenari atë që e quante “Kampionatin Botëror më të mirë të historisë”.
Krah mikut të tij, Donald Trump, presidenti i FIFA-s dukej i bindur se e kishte nën kontroll të gjithë sistemin e futbollit, si të tashmen ashtu edhe të ardhmen.
Por, situata ka ndryshuar me shpejtësi dhe sot zvicerani duket më i izoluar se kurrë.
Sipas një analize të publikuar nga Tuttomercatoweb, Infantino ka gabuar rëndë duke e shtyrë përpara projektin FIFA Forward Enterprise (FFE), që e parashikonte privatizimin e një pjese të Botërorit.
Ideja shkaktoi reagime të forta dhe u konsiderua nga shumë si një përpjekje për ta kthyer futbollin në një biznes të pastër, duke e kujtuar dështimin e projektit të Superligës Evropiane.
Presidenti i UEFA-s, Aleksander Çeferin, e ka shfrytëzuar pakënaqësinë e krijuar për t’i bindur federatat anëtare se një mandat i ri i Infantinos në krye të FIFA-s nuk është më i pranueshëm.
Mundësitë për rizgjedhjen e tij janë zvogëluar ndjeshëm, ndërsa nuk përjashtohet as mundësia e dorëheqjes.
Megjithatë, mbështetja e Donald Trump vazhdon të shihet si një kartë e rëndësishme për presidentin aktual të FIFA-s.
Madje, raportohet se Infantino e ka kërkuar ndihmën e administratës amerikane për ta ruajtur postin e tij.
Në rast se Infantino largohet, FIFA do ta humbiste një drejtues me aftësi të mëdha në marketing dhe menaxhim biznesi.
Megjithatë, ky mund të ishte momenti i duhur për t’ia besuar drejtimin e institucionit një njeriu me përvojë të thellë futbolli.
Emri që përmendet është ai i Arsène Wenger, aktualisht përgjegjës për zhvillimin global të futbollit në FIFA dhe një figurë me reputacion të madh në botën e futbollit.
Ironikisht, ishte vetë Gianni Infantino ai që e afroi Wengerin në FIFA.
