Administrata e presidentit Donald Trump ka ndërmarrë hapa për të pushuar nga puna afro 500 punonjës të Zërit të Amerikës (VOA), transmetuesi i financuar nga qeveria amerikane, në një përpjekje të re për të mbyllur pjesërisht këtë agjenci, të cilën Shtëpia e Bardhë e ka akuzuar si “radikale”.
Drejtoresha e përkohshme ekzekutive e agjencisë mëmë të VOA, Kari Lake, deklaroi se vendimi do të “ndihmonte në uljen e burokracisë federale, përmirësimin e shërbimit të agjencisë dhe kursimin e më shumë parave të fituara me mund për popullin amerikan”.
Nga ana tjetër, një sindikatë që përfaqëson punonjësit e ka cilësuar këtë hap si të paligjshëm, sipas një deklarate dhënë për New York Times.
Zëri i Amerikës, i krijuar gjatë Luftës së Dytë Botërore për t’iu kundërvënë propagandës naziste, është sot një transmetues global i përmbajtjeve në afro 50 gjuhë. Ai mbikëqyret nga Agjencia për Median Globale të SHBA-së (USAGM), e cila në një dokument gjyqësor bëri të ditur se do të eliminoheshin gjithsej 532 pozicione, shumica prej të cilave nga VOA. Pas pushimeve, ky i fundit pritet të mbetet me vetëm 108 punonjës.
Në qershor, Lake kishte njoftuar për pushimin e 639 punonjësve, por njoftimet u anuluan përkohësisht për shkak të gabimeve në dokumente. Disa punonjës më pas ngritën padi për të bllokuar shkarkimet.
Vendimi i fundit u bë publik të premten në mbrëmje, një ditë pasi një gjykatës urdhëroi që administrata Trump nuk kishte ndjekur procedurat e duhura ligjore në përpjekjen për të shkarkuar drejtorin e atëhershëm të VOA, Michael Abramowitz. Gjykatësi gjithashtu urdhëroi që Lake të japë një dëshmi zyrtare përballë avokatëve të punonjësve.
Padia u ngrit nga një grup punonjësish të cilët akuzojnë administratën për përpjekje të qëllimshme për të shpërbërë VOA-në.
“Ne i konsiderojmë sulmet e vazhdueshme të Lake ndaj agjencisë sonë të neveritshme,” thanë ata për CBS News.
“Ne mezi presim dëshminë e saj për të dëgjuar nëse plani i saj për të shpërbërë Zërin e Amerikës është bërë me procesin rigoroz të shqyrtimit që kërkon Kongresi. Deri më tani nuk kemi parë asnjë provë për këtë, dhe si të tillë ne do të vazhdojmë të luftojmë për atë që besojmë se janë të drejtat tona sipas ligjit,” shtuan ata.
Ndërkohë, pjesa më e madhe e gazetarëve të Zërit të Amerikës janë në pushim administrativ që nga marsi, përjashtuar disa që raportojnë në gjuhën persisht, të thirrur sërish për shkak të konfliktit midis Izraelit dhe Iranit këtë verë.
Njoftimet nuk prekin gazetarët e Zyrës së Transmetimeve në Kubë, që transmetojnë në spanjisht nga Miami.
Kritikët e administratës Trump e konsiderojnë këtë veprim si një sulm të drejtpërdrejtë ndaj lirisë së shtypit dhe një dëm për aftësinë e SHBA-së për të ushtruar ndikim përmes mjeteve të buta ndërkombëtare. Shtëpia e Bardhë e ka akuzuar më parë VOA-në si “anti-Trump” dhe “radikale”.
