Administrata Trump ka zhvilluar bisedime të drejtpërdrejta me Hamasin për lirimin e qytetarëve amerikanë të kapur peng në Gazë dhe mundësinë e një marrëveshje më të gjerë për përfundimin e luftës.
Këto janë pohime të mediumit Axios, e cila ka marrë konfirmime nga dy burime dhe thekson se negociatat, të udhëhequra nga dërguari i presidentit amerikan për çështjet e pengjeve, Adam Boehler, janë pa precedent.
SHBA nuk kanë pasur asnjëherë kontakte të drejtpërdrejta me Hamasin, të cilin e shpallën organizatë terroriste në vitin 1997.
Edhe pse administrata e presidentit amerikan, Donald Trump ka pasur konsultime me Izraelin për mundësinë e angazhimit me Hamasin, Izraeli ka mësuar për aspektet e negociatave përmes kanaleve të tjera.
Bisedimet janë përqendruar pjesërisht në lirimin e qytetarëve amerikanë të kapur, një çështje që është në fushën e përgjegjësisë së Boehler si dërguar për pengjet.
Megjithatë, ato kanë përfshirë gjithashtu biseda për një marrëveshje më të gjerë për lirimin e të gjithë pengjeve të mbetur dhe arritjen e një armëpushimi afatgjatë, por ende nuk është arritur asnjë marrëveshje.
Përfaqësuesi i Shtëpisë së Bardhë, Steve Witkoff, gjithashtu kishte planifikuar të udhëtonte në Doha këtë javë për t’u takuar me kryeministrin e Katarit dhe për të diskutuar për ndërprerjen e luftimeve, por e anuloi udhëtimin të martën në mbrëmje pasi pa që nuk kishte pasur përparim nga ana e Hamasit.
Mediumi thekson se qasja e liderit amerikan është shumë ndryshe nga ajo e presidentit të kaluar amerikan, Joe Biden.
Negociatat e drejtpërdrejta me Hamasin, veçanërisht pa dijeninë e Izraelit, janë një hap tjetër që administratat e mëparshme nuk e ndërmorën.
Ndryshe, Izraeli dhe Hamasi tashmë kanë përfunduar fazën e parë të shkëmbimit të pengjeve me të burgosurit.
