Kryetari i Lidhjes Demokratike të Kosovës, Lumir Abdixhiku në 22 vjetorin e rënies, ka përkujtuar Sali Çekaj.
Kujtojmë Sali Çekaj, Heroin e Kosovës, në njëzet e dy vjetorin e rënies së tij në Betejën e Koshares, veprën e të cilit e ruajmë si trashëgimi politike e atdhetare për lirinë dhe shtet ndërtimin e Kosovës. Rezistencën e tij politike e nisi përmes aktivitetit në Lidhjen Demokratike të Kosovës, krah Presidentit Historik dr. Ibrahim Rugova. Në kohën kur i nevojitej më së shumti vendit tonë, ai me pushkë në dorë iu bashkua radhëve të UÇK-së në Koshare dhe kështu, u shndërrua në Heroin e pavdekshëm të Kosovës”, ka shkruar Abdixhiku.
Njëherit ka theksuar se Sali Çekaj ishte intelektual i rrallë, jurist me profesion, dhe ushtarak i kalibrit të lartë, ishte detyruar nga regjimi okupues serb që të largohej nga Kosova, por aktivitetin e tij nuk e ndali asnjëherë.
“Si nënkryetar i Degës së LDK-së në Gjermani, u bë organizator i shkëlqyeshëm i shqiptarëve për të ndihmuar materialisht e politikisht çlirimin e Kosovës. Sali Çekaj me punën dhe përkushtimin
e tij, prej politikani e ushtaraku vizionar, do mbetet përherë në piedestalin e historisë tonë. Lavdi e përjetshme jetës dhe veprës së Heroit të Kosovës Sali Çekaj!”, ka thënë Abdixhiku.
