Dy zyrtarë amerikanë kanë humbur jetën në një aksident me veturë në Meksikë, ndërsa po ktheheshin nga një operacion për shkatërrimin e një laboratori klandestin droge, ku punonin për CIA-n.
Sipas një zyrtari amerikan dhe dy personave të tjerë të njohur me çështjen, në aksident kanë mbetur të vdekur edhe dy hetues meksikanë. Autoritetet meksikane kanë bërë të ditur se aksidenti ndodhi teksa zyrtarët po ktheheshin nga një operacion kundër laboratorëve të drogës të grupeve kriminale.
Përfshirja e CIA-s është konfirmuar të martën nga një zyrtar amerikan dhe dy persona me njohuri për rastin, të cilët kanë folur në kushte anonimiteti për AP-në. Identiteti i dy amerikanëve si oficerë të CIA-s ishte raportuar më herët nga The Washington Post.
Konfirmimi i përfshirjes së CIA-s vjen pas disa ditësh kontradiktash nga autoritetet meksikane dhe amerikane lidhur me rolin e zyrtarëve amerikanë në operacionin për shkatërrimin e një narko-laboratori në Chihuahua veriore.
Mungesa e qartësisë nga autoritetet ka ringjallur debatin për shkallën e përfshirjes së SHBA-së në operacionet e sigurisë në Meksikë, në një kohë kur presidentja meksikane, Claudia Sheinbaum, po përballet me presion nga administrata e presidentit Donald Trump për të goditur kartelet.
Ambasada e SHBA-së ka refuzuar të identifikojë zyrtarët amerikanë ose institucionin për të cilin punonin, por ka deklaruar se ata po “mbështesnin përpjekjet e autoriteteve të shtetit Chihuahua për të luftuar operacionet e karteleve”.
Ndërkohë, Sheinbaum ka thënë se nuk kishte dijeni për një operacion të përbashkët midis qeverisë së Chihuahua-s dhe SHBA-së, pavarësisht raportimeve se ushtria meksikane ishte gjithashtu e përfshirë në bastisjen në laborator.
