Prokuroria Themelore në Mitrovicë ka ngritur aktakuzë ndaj tre personave, A.H, E.M, dhe B.A, për akuzat e dallavereve në një konkurs të shpallur në janar të vitit 2020 në ndërmarrjen Trepça.
Sipas njoftimit të Prokurorisë, të akuzuarit kanë shkelur rregulloren e vlerësimit gjatë procesit të intervistimit me gojë të kandidatëve, raporton Gazeta Enigma.
Në vend që të ndanin 20 pikë për çdo përgjigje të saktë, ata kanë vlerësuar kandidatët me nga 25 pikë për pyetje, duke arritur një total prej mbi 100 deri në 300 pikë.
Kjo praktikë, sipas Prokurorisë, ka rezultuar në sistemimin e shtatë individëve në vende pune dhe ka privuar kandidatët e tjerë nga e drejta për punësim dhe kushte të barabarta, siç parashikohet me ligj.
Ky rast nënvizon shqetësimet për transparencën dhe drejtësinë në proceset e punësimit në institucionet publike, duke u bërë thirrje autoriteteve për një hetim të plotë dhe të paanshëm./GazetaEnigma/
