Lidhja Demokratike e Kosovës (LDK) ka bërë një kritikë të ashpër ndaj Qeverisë Kurti, duke e akuzuar për “gjashtë vjet dështimesh” dhe për përkeqësimin e kushteve të jetesës për qytetarët.
Sipas LDK-së, qytetarët po përballen me rritje të çmimeve dhe fatura më të shtrenjta, ndërsa Qeveria po përdor “retorikë boshe nacionaliste” si mjet për të mbuluar dështimet e saj. LDK gjithashtu ka akuzuar Qeverinë për patriotizëm të rremë dhe për përdorimin e Serbisë si një mjet propagande, duke theksuar se kjo është “gjuha e vetme që u ka mbetur”.
Kryetari i LDK-së, Lumir Abdixhiku, gjatë një fjalimi para qytetarëve në Prizren, iu përgjigj akuzave të Lëvizjes Vetëvendosje (LVV) për “kthimin” e Serbisë në Kosovë. Ai, me ironi, iu drejtua Anton Qunit, një ish-luftëtar në Koshare, duke e pyetur: “Anton, a po don ti me kthy Serbinë?”
Abdixhiku e theksoi se Qeveria Kurti ka pasur gjashtë vjet në pushtet, por rezultatet janë “katastrofale”. “Çmimet po rriten, rryma po bëhet më e shtrenjtë, dhe atje Vuk Hamoviqi po përfiton miliona nga importi i energjisë elektrike, të cilën ata po mundohen ta fshehin. Edhe dje, edhe sot, ai fiton 3-4 qind mijë euro në ditë,” tha Abdixhiku.
“Pra ky është patriotizmi fals i tyre. Ju lus të mobilizoheni fort, të tregoni saktë se ku janë problemet dhe si duhet t’i zgjidhim ato,” shtoi ai. Kryetari i LDK-së gjithashtu theksoi se populli i Kosovës pret shumë nga partia që ai drejton, dhe madje partitë e tjera po shprehin dëshirën për bashkëpunim.
