Situata mmidis Kosovës dhe Serbisë si edhe qëndrimet që po mbahen karshi të dyja palëve nga liderët e Bashkimit Europian dhe Shteteve të Bashkuara të Amerikës, për analistin amerikan për çështjet e Ballkanit Perëndimor, Edward Joseph, janë të gabuara.
“Çfarë po ndodh në Kosovë nuk është situatë e re, e kemi pare prej vitesh tashmë dhe arsyeja është se SHBA-ja, si lider kryesor, bashkë dhe me BE-në nuk po e tregojnë forcën që ata kanë, që janë të parët që luajnë kartat dhe nuk lëviz asgjë Vuçiq dhe sigurisht as Kurti. Dhe në vend që të tregojnë forcën të dyja, si SHBA-ja ashtu edhe BE-ja, ata kanë përkrahur Vuçiqin dhe kjo është parë nga Kurti i cili u druhet aksioneve në Kosovë. Mesazhi im është shumë i qartë, dobësia sjell dobësinë, kështu që ne kemi qenë të dobët me Vuçiqin, edhe pse e dimë aleancën e tij të fortë me Rusinë dhe me Kinën ne të gjithë e kemi para Vulinin të takohet me Putinin dhe Vuçiqi që priti Shi Xhin Pingun, gjithashtu ato kanë marrëdhënie të ngushta me Iranin. Kjo është gjendja dhe Kurti thotë unë e shoh sa të dobët po tregoheni dhe unë po përfitoj dhe ndërkohë tregohet provokativ me serbët e Kosovës dhe ky është një problem i madh”, u shpreh ai për rtsh.
Ndërkohë, profesor Joseph thekson se zgjidhja mbetet te hapat e menjëhershëm që fuqitë e mëdha duhet të ndërmarrin duke ndërruar me shpejtësi të gjithë politikën e tyre në lidhje me Ballkanin Perëndimor.
“SHBA-ja duhet menjëherë të ndryshojë qëndrimin kundrejt Beogradit dhe pastaj mund të kemi një shans me Prishtinën. Momentalisht SHBA-ja dhe BE-ja po e mbajnë fokusin te Prishtina dhe çfarë mund t’i bëjnë më shumë Kurtit, edhe pse për mendimin tim ajo çfarë po bën Kurti është problematike, por nga ana tjetër liderët nuk po bëjnë asgjë për Vuçiqin, pasi duan përkrahjen e Serbisë për Ukrainën si dhe duan litiumin e këtij vendi. Duhet të jetë e kundërta, sa më shumë presion t’i ushtrojë SHBA-ja dhe BE-ja Vuçiqit, aq më e madhe do të jete përkrahja e tij për Ukrainën dhe do të kemi më shumë shanse të bindim popullin serb që gërmimi për litium nuk dëmton ambientin. Nëse ne do të vazhdojmë të përkrahim Vuçiqin, ne do të humbasim popullin serb pasi ata nuk do të na besojnë për litiumin dhe gjithashtu do të humbasin edhe Albin Kurtin, i cili nuk do të na besojë më.”, deklaroi analisti amerikan.
Marrëdhëniet e liderëve europianë si Makron dhe Sholz me presidentin serb, Vuçiç, për analistin amerikan për çështjet e Ballkanit Perëndimor, Edward Joseph, janë në ndjekje të politikës se SHBA-së.
“Makron dhe Sholz po ndjekin pas vijën politike amerikane. Ata mendojnë se t’i shesësh arme Vuçiqit ai do të rrisë përkrahjen për ta, por është e kundërta Vuçiq po përfiton dhe do të vazhdojë politikën e tij destabilizuese në rajon, duke tërhequr pas vetes edhe Kurtin i cili do të vijojë të jetë provokativ me serbët e Kosovës”, theksoi Joseph.
