Po bëhet një vit që kur Vladimir Putin urdhëroi një “operacion special ushtarak” në Ukrainë. Që atëherë, konflikti është zhvilluar në dy mënyra: në fushën e betejës, ku trupat ruse dhe ukrainase po luftojnë në fronte të ndryshme; dhe në tavolinën gjeopolitike.
Që në fillim, Ukraina ka pasur mbështetjen pothuajse të palëkundur të Bashkimit Evropian, Shteteve të Bashkuara, Mbretërisë së Bashkuar dhe vendeve të NATO-s. Nga ana e saj, Rusia është mbështetur veçanërisht nga Irani dhe, megjithëse jo drejtpërdrejt, ekonomikisht nga Kina dhe India, të cilat kanë rritur importet e naftës dhe gazit rus.
Por, edhe vende të tjera shfaqen gjithmonë në konflikt, të gatshëm për të ndërmjetësuar. Ky është rasti i Arabisë Saudite, e cila ka vendosur të përfshihet aktivisht në luftë. Në Konferencën e fundit të Sigurisë së Mynihut të mbajtur këto ditë dhe në të cilën kanë marrë pjesë liderët kryesorë botërorë (Rusia nuk është ftuar), vendi i Gjirit Persik ka treguar gatishmërinë e tij për të ndërmjetësuar në luftë.
Siç njoftoi ministri i Jashtëm i Arabisë Saudite, Faisal bin Farhan Al Saud, vendet e Gjirit do të kontribuojnë në zgjidhjen paqësore të konfliktit midis Rusisë dhe Ukrainës: “Ne, në Këshillin e Bashkëpunimit për Shtetet Arabe të Gjirit Persik (GCC) dëshirojmë që konflikti të përfundojë. Natyrisht, ky konflikt duhet të përfundojë përmes negociatave dhe ne do të përpiqemi të japim ndihmën tonë me sa mundemi”.
Al Saud ka konfirmuar se po vazhdojnë bisedimet si me Ukrainën, ashtu edhe me Rusinë, për t’i dhënë fund konfliktit. Ministri kujtoi ndihmën që vendi i tij kishte dhënë për shkëmbimin e fundit të të burgosurve midis Rusisë dhe Ukrainës dhe ripohoi angazhimin e Princit të Kurorës së Arabisë Saudite, Mohammed bin Salman Al Saud, për të udhëhequr negociatat midis Rusisë dhe Ukrainës.
Ministri i Marrëdhënieve me Jashtë tha se nuk sheh një ndërprerje të afërt të armiqësive, por iniciativat e paqes beson se mund të shërbejnë për afrimin e negociatave midis Rusisë dhe Ukrainës: “Nëse mund të gjejmë disa iniciativa të vogla që mund të fillojmë t’i përdorim për të krijuar një nivel të caktuar besimi midis palëve, kjo do të lehtësojë diskutimet e ardhshme dhe procesin e zgjidhjes së konfliktit përmes negociatave”.
