Kryeministrja e Serbisë, Ana Bërnabiq, ka thënë se emisari i Shteteve të Bashkuara të Amerikës për Ballkanin Perëndimor, Gabriel Escobar, është një politikan me vendosshmëri kundër rezolutave të Këshillit të Sigurimit të OKB-së.
Ajo, me anë të një cicërime në Twitter, ka thënë se Escobar e ka marrë rolin e OKB-së dhe se me votën unanime të Ministrisë së Jashtme të Gjermanisë dhe të raportueses për Kosovën në Parlamentin Evropian, Viola von Cramon, e ka anuluar rezolutën 1244.
“Nuk ka nevojë që OKB-ja të organizojë seanca të Këshillit të Sigurimit, si një masë kursimi, kjo trojkë do të vendosë për të gjitha çështjet globale tash e tutje. Një pyetje nëse mundem, nëse Rezoluta 1244 nuk është më e vlefshme (sepse nuk ju pëlqen, dhe, ndonëse askujt nuk i bëhet vonë), dhe nëse Marrëveshja e Brukselit nuk ekziston (siç thotë Kurti, dhe ju udhëheqës të mëdhenj nuk i keni mohuar kurrë fjalët e tij)”.
“Dhe nëse Marrëveshja e Uashingtonit nuk është gjë tjetër veçse një gjë e së kaluarës (thjesht nuk është më në modë), dhe Karta e OKB-së nuk zbatohet për Serbinë (sepse, përsëri, ju, udhëheqës të mëdhenj, mendoni se nuk duhet) – atëherë në përputhje me çfarë marrëveshjeje/rezolute/parimi duhet të veprojmë?”
“Apo thjesht duhet të ndjekim horoskopin tuaj për të marrë me mend dëshirat tuaja dhe për të ndihmuar në shpëtimin e paqes në botë? Ju falënderoj për kohën tuaj – mund ta imagjinoj se sa e zënë duhet të jetë për të drejtuar botën në vend të OKB-së”, ka shkruar Bërnabiq.
Escobar sot në një intervistë për Radio Evropën e Lirë ka thënë se SHBA është kategorikisht kundër kërkesës së paralajmëruar të Serbisë për dërgim të forcave serbe në Kosovë, pas zhvillimeve të fundit ku janë vendosur edhe barrikada në veri.
