Pa sukses, sot u zhvilluan takimet e radhës në kuadër të procesit të dialogut në Bruksel, ku temë kryesore ishte çështja e largimit të dinarit serb nga përdorimi në Kosovë.
Zëvendëskryeministri i Kosovës, Besnik Bislimi tha nga Brukseli se qasja e Serbisë nuk ishte e duhura.
“Takimi i sotëm ka ndodhur dy ditë pas vendimit shumë të rëndësishëm në Këshillin e Evropës, vendim ky që manifestoi edhe modelin evropian, por edhe të Kosovës se si duhet të promovohet edhe integrimi i rajonit, por edhe të ndërtohen raportet mes vendeve fqinje. Dhe një ditë pas manifestimit të modelit serb të normalizimit dhe integrimit apo zbatimit të marrëveshjeve që u manifestua përmes ekspozimit të një mentaliteti mesjetar të trajtimit të qytetarëve të një vendi fqinj, përmes ndaljes së tyre nëpër pikat kufitare, arrestimit, maltretimit të tyre, dhe në këtë kontekst mbase duhet të shihet dhe qasja e Serbisë në takimin e sotëm”, tha ai.
Bislimi tha se pala serbe në takimin e sotëm “në mënyrë perfekte treguan kotësinë dhe pamë mosvërtetësinë e konstatimit të tyre të hershme që kemi një çështje urgjente ku disa qytetarë serb nuk kanë arritur të marrin benefitet e tyre”.
“Njësoj si herët e kaluara ka patur zero interesim nga pala serbe që të merren me këta qytetarë dhe gjithë energjia e tyre është sërish e orientuar drejt licencimit të një subjekti ekonomik të Serbisë në Kosovë, gjë që për ne është e papranueshme dhe këtë e kemi bërë të qartë në vazhdimësi”.
Bislimi tha se “takimi i sotëm është dashur të ndodhë vetëm në një frymë konstruktive ku ne është dashur të diskutojmë mbi propozimin e konsoliduar të z. Lajçak”. Në vend të kësaj, ai tha se “Serbia ka ardhur me një propozim krejtësisht të ri duke dashur që situatën ta kthejë në pikën fillestare”. Ndërsa shtoi se kjo s’është pranuar, kryenegociatori kosovare tha se “në fund Serbia ka pranuar që të kthehet tek ajo pikë ku është dashur të jemi sot, rrjedhimisht që në takimin e ardhshëm të diskutojmë kryekëput dhe ekskluzivisht mbi propozimin e palës evropiane”.
“Rrjedhimisht ky takim i sotëm mund të quhet si takim i kotë, i pa rezultat dhe ndoshta si sukses i politikës obstruktive të palës serbe, e cila vetëm ka dëshiruar të blejë kohë në vazhdimësi dhe me çka na konfirmon qëndrimin tonë se në këtë problematikë me të cilën ballafaqohemi me gjasë nuk ka kurrfarë urgjence dhe nuk ka kurrfarë interesimi të palës serbe që brengat e qytetarëve serb të trajtohen”, tha Bislimi.
I pyetur se “përse ekziston motivi së paku te pala kosovare që të vini sërish në një takim tjetër”, Bislimi tha se janë pajtuar që “takimi i ardhshëm në asnjë mënyrë të mos mund të keqpërdoret”.
“Neve javën e kaluar na është thënë nga z. Lajçak që takimi i kësaj jave do të jetë takimi i fundit, për arsye se ai do të mundësojë takimin vetëm nëse pala serbe tregon qartë se do të vijë për të përmbyllur marrëveshjen sipas principeve dhe propozimit të z. Lajçak. Duke qenë se kjo nuk ka ndodhur, atëherë ne kemi insistuar që takimi të organizohet vetëm nëse palët i dërgojnë propozimet e tyre deri në ditën e hënë dhe nëse z. Lajçak konstaton që propozimet janë në linjë me idetë e tij të distribuara javën e kaluar. Do të thotë, kemi arritur të ndikojmë që takimi i ardhshëm në asnjë mënyrë të mos mund të keqpërdoret nga ana e Serbisë për të shtyrë edhe mëtej vendimmarrjen”, tha Bislimi.
I pyetur të komentojë se sa kanë ndikuar rrethanat e ditës së djeshme në takimin e sotëm, zëvendëskryeministri tha: “Unë mendoj që për procesin është rrethanë rënduese, ndërsa për Serbinë ka qenë ndoshta rrethanë lehtësuese ku ata e kanë pas edhe një vendim ku e kanë shpreh mllefin e tyre me faktin që shumica e vendeve evropiane shikojnë nga e ardhmja e jo nga e kaluara”.
