Kryetari i Podujevës, Shpejtim Bulliqi, tha se nuk e ka në plan të kandidoj në zgjedhjet e ardhshme komunale, por se nëse i kërkohet një gjë e tillë nga partia, “nuk e kam problem që ta bëj”.
“Tek ne si subjekt politik është një proces pak më ndryshe, ne e kemi njëfar demokraci pak më të avancuar, për arsye se tek ne njerëzit aplikojnë, e mbush aplikacionin, konkurron, ka me i marrë një të tretën e nënshkrimeve të anëtarëve të Këshillit të Përgjithshëm, e bën aplikacionin dhe aplikacionet shkojmë nëpër komisionet gjegjëse dhe shqyrtohen. Kështu zgjidhen ata që i plotësojnë kriteret, i kanë përcjellur të gjitha rregullativat ligjore edhe shkojnë tutje”, tha Bulliqi në Rubikon të Klan Kosovës.
“Kryesia e nivelit qendror, Këshilli i Përgjithshëm e jep verdiktin final. Tash varet prej subjektit politik si e sheh këtë çështje, unë e kuptova nga Smajli që tek Aleanca këta po konkurrojkan. Unë për vete nuk kam plan të konkurrojë, sepse nuk kam aplikuar, është mbyllur afati i aplikimit, nuk kam bërë aplikacion. Por, nëse kërkohet që duhet të jetë pjesë e asaj liste unë nuk e kam hiç telashe që të jem pjesë e asaj liste”, u shpreh tutje ai.
